Türkiyə qitələrarası ticarət yollarını gücləndirməyi hədəfləyən İstanbul Şimal Dəmir Yolu Keçidi (INRAIL) layihəsi üçün Dünya Bankı ilə 1,67 milyard avro məbləğində maliyyələşdirmə müqaviləsi imzalayıb. Müqavilə Vaşinqtonda keçirilən Beynəlxalq Valyuta Fondu və Dünya Bankının Yaz Görüşləri çərçivəsində Türkiyənin xəzinə və maliyyə naziri Mehmet Şimşek və Dünya Bankının əməliyyatlar üzrə direktoru Anna Bjerde tərəfindən imzalanıb.
Nazir Mehmet Şimşek layihənin ümumi dəyərinin 8,1 milyard dollar olduğunu və bu vəsaitin təxminən 83 faizinin beynəlxalq təşkilatlar tərəfindən təmin edildiyini vurğulayıb. O, bu tərəfdaşlığın təkcə maliyyə qaynağı deyil, həm də beynəlxalq standartların gücləndirilməsi və qlobal bazarlara etimad mesajı baxımından böyük əhəmiyyət kəsb etdiyini bildirib.INRAIL layihəsi çərçivəsində Yavuz Sultan Səlim körpüsü üzərindən Bosfor boğazını keçən, 127 kilometrlik yüksək ötürücülük qabiliyyətinə malik dəmir yolu xətti tikiləcək.
Bu nəhəng layihə istifadəyə veriləndən sonra Boğaz üzərindən dəmir yolu ilə illik yükdaşıma həcminin 3 milyon tondan 50 milyon tona çatdırılması planlaşdırılır. Layihə İstanbulun hər iki hava limanını milli dəmir yolu şəbəkəsinə bağlamaqla yanaşı, logistika xərclərini əhəmiyyətli dərəcədə azaldacaq.
Mehmet Şimşek qeyd edib ki, INRAIL layihəsi Pekini Londonla birləşdirən "Orta Dəhliz" üzərindəki ən böyük maneələrdən birini aradan qaldıraraq tranzit müddətini 18 günə endirəcək. Layihə başa çatdıqdan sonra 400 mindən çox insanın yüksək gəlirli işlə təmin olunacağı gözlənilir.
Dünya Bankının rəsmisi Anna Bjerde isə müqavilənin Türkiyənin Avropa, Asiya və Yaxın Şərq ilə nəqliyyat əlaqələrini simvolizə etdiyini və qlobal ticarətə müsbət təsir göstərəcəyini vurğulayıb. Son 20 ildə nəqliyyat infrastrukturuna 355 milyard dollar investisiya qoyan Türkiyə üçün dəmir yollarının inkişafı növbəti strateji hədəf hesab olunur və Dünya Bankı bu prosesdə əsas tərəfdaş kimi çıxış edir.
