Türkiyə Xarici İşlər Nazirliyi, İsrailin İtaliyadan yola düşən və Qəzzaya humanitar yardım aparan "Qlobal Sumud Donanması"na qarşı beynəlxalq sularda həyata keçirdiyi müdaxiləni sərt şəkildə qınayıb. Nazirliyin yaydığı rəsmi bəyanatda bu hücumun beynəlxalq hüququ və naviqasiya azadlığını kobud şəkildə pozduğu vurğulanıb. Türkiyə XİN mülki yardım gəmilərinin hədəf alınmasını "quldurluq aktı" adlandırıb.

Bəyanatda donanmada olan Türkiyə və digər ölkə vətəndaşlarının təhlükəsizliyi üçün müvafiq dövlətlərlə sıx əməkdaşlıq çərçivəsində bütün lazımi addımların atıldığı qeyd olunub.

Yunanıstanın Krit adası yaxınlığında İsrail hərbi gəmiləri tərəfindən mühasirəyə alınan donanmanın rabitə sistemlərinin kəsildiyi, gəmilərin mühərriklərinin və naviqasiya cihazlarının sıradan çıxarıldığı bildirilib.

400-dən çox mülki şəxsi daşıyan donanmanın əsas məqsədi, 2007-ci ildən bəri İsrailin blokadası altında olan Qəzzaya humanitar yardım çatdırmaq idi. "Qlobal Sumud Donanması"nın bu blokadanı yarmaq məqsədilə başlatdığı "2026-cı ilin Yaz Missiyası" aprelin 26-da yola düşmüşdü.

İsrailin 2023-cü ilin oktyabrında başlatdığı soyqırımı xarakterli müharibə nəticəsində ən azı 72.600 fələstinli həlak olub, 172.400-dən çox şəxs isə yaralanıb.

Qeyd edək ki, 2025-ci ilin oktyabrında əldə olunmuş atəşkəs razılaşmasına baxmayaraq, İsrail hələ də Qəzzaya hücumlarını davam etdirir və mühasirə altında olan əraziyə humanitar yardımların daxil olmasını ciddi şəkildə məhdudlaşdırır.