“The Times” qəzetinin məlumatına görə, Böyük Britaniyanın müdafiə naziri Con Hilini (John Healey) daşıyan Kralllıq Hərbi Hava Qüvvələrinə məxsus təyyarə Rusiya sərhədi yaxınlığında siqnal müdaxiləsinə məruz qalıb.
Mayın 24-də dərc olunan xəbərdə bildirilir ki, Hilinin Estoniyanın cənub-şərqinə etdiyi səfərdən sonra mayın 21-də Böyük Britaniyaya qayıtdığı zaman hökumət təyyarəsindəki peyk siqnalları kəsilib.
Siqnal müdaxiləsinin üç saatlıq uçuş boyu təyyarənin GPS sistemini sıradan çıxardığı qeyd olunur.
Məlumata görə, bu kəsinti təyyarədəki noutbuklara və smartfonlara da təsir edib, pilotlar təyyarənin yerini müəyyən etmək üçün alternativ inersial naviqasiya sistemlərinə müraciət etməli olublar.
Xəbərdə hadisənin arxasında Rusiyanın dayandığının ehtimal edildiyi vurğulanıb.
Pilotlardan biri hadisəni uzun müddətdir qarşılaşmadığı qeyri-adi bir hal kimi qiymətləndirib.
