Ermənistan hökumətinin elan etdiyi 5 illik fəaliyyət planına Azərbaycanla bərqərar olunmuş sülhün möhkəmləndirilməsi, Türkiyə ilə diplomatik münasibətlərin qurulması və sərhədlərin açılması daxildir.

"Armenpress"in məlumatına görə, növbədənkənar parlament seçkilərində qalib gələn Nikol Paşinyan hökumətinin "Əsl Ermənistan" konsepsiyasına əsaslanan 2026–2031-ci illər üzrə proqramı açıqlanıb.

Proqramda gözlənilən mühüm xarici siyasət nəticələri arasında Azərbaycanla bərqərar olmuş sülhün möhkəmləndirilməsi və institusionallaşdırılması, Türkiyə ilə diplomatik münasibətlərin qurulması və region ölkələri ilə münasibətlərin normallaşdırılması yer alır.

Xarici siyasətdə Bakı və Ankara ilə münasibətlərin normallaşdırılması

Proqramın xarici siyasət bölməsində Ermənistanın "balanslı və sabitləşdirici xarici siyasət" kursunu davam etdirəcəyi mesajı verilir.

Ermənistan hökuməti Türkiyə ilə münasibətləri nizama salmağa, Azərbaycanla sülhü rəsmiləşdirməyə, Avropa İttifaqı, ABŞ, İran, Gürcüstanla strateji əlaqələri və Rusiya ilə çoxşaxəli əlaqələri inkişaf etdirməyə hazırlaşır.

Bildirilib ki, Ermənistan hökuməti Azərbaycanla sərhədin delimitasiyası, eləcə də Azərbaycanla sülhün institusionallaşdırılması, həmçinin iki ölkənin vətəndaş cəmiyyəti və işgüzar dairələri arasında əlaqələrin aktivləşməsi üzrə işləri davam etdirəcək.

Proqramda, Türkiyə ilə normallaşma prosesinin irəlilədilməsi, diplomatik münasibətlərin qurulması, sərhədlərin açılması və "ən azı iki müasir sərhəd-keçid məntəqəsinin" fəaliyyətə başlaması üçün səylərin göstəriləcəyi, eyni zamanda nəqliyyat, enerji və rəqəmsal infrastruktur sahələrində inkişafın hədəfləndiyi bildirilir.

Bundan əlavə, sənəddə Ankara ilə ikitərəfli və çoxtərəfli ticarətin təşviqi istiqamətində addımların atılacağı vurğulanır.

Qeyd edək ki, Nikol Paşinyanın "Mülki Müqavilə" Partiyası seçkilərdə səslərin 49,74%-ni toplayaraq parlamentdə yenidən əksəriyyəti və hökuməti formalaşdırmaq hüququnu təmin edib.