Rusiya prezidenti Vladimir Putinin təhlükəsizlik məsələləri üzrə baş müşavirlərindən biri olan Sergey Şoyqu Şimali Koreyaya gəlib. TASS xəbər agentliyinin cümə günü verdiyi məlumata görə, Şoyqunun səfəri iki ölkə arasında sürətlə inkişaf edən təhlükəsizlik əməkdaşlığı prosesinin bir hissəsidir.
Məlumatda həmçinin qeyd olunub ki, Şoyqunun Şimali Koreya lideri Kim Çen İnlə görüşmək planları var. Lakin Şimali Koreyanın dövlət mediası Şoyqunun gəlişi ilə bağlı heç bir açıqlama verməyib.
2024-cü ilin may ayına qədər Rusiyanın müdafiə naziri vəzifəsini icra edən Şoyqu bundan əvvəl də Şimali Koreyaya səfər etmişdi. Həmin vaxt Pxenyan hökuməti Ukrayna müharibəsində Rusiyanın tərəfində döyüşmək üçün qoşun göndərməyə hazırdı.
ABŞ və Cənubi Koreya rəsmiləri bildiriblər ki, Şimali Koreya Rusiyanın şərqindəki Kursk bölgəsinə 10 mindən çox əsgər yerləşdirib. Əlavə olaraq da ağır silahlar, artilleriya sistemləri və ballistik raketlər göndərib.
Bunun müqabilində isə Şimali Koreyanın Moskvadan hərbi və mülki texnologiya, eləcə də iqtisadi dəstək aldığı düşünülür.
Ancaq nə Pxenyan, nə də Moskva rəsmi olaraq Şimali Koreyanın Rusiyaya qoşun və silah göndərdiyi ilə əlaqəli məlumat etiraf etməyib. Bununla belə, iki ölkə liderlərinin 2023-cü ilin iyununda imzaladığı strateji tərəfdaşlıq sazişi çərçivəsində qarşılıqlı müdafiə paktı da daxil olmaqla əməkdaşlığı davam etdirdiklərini bildiriblər.
