Livanın şimalındakı Tripoli şəhərində köhnə yaşayış binasının çökməsi nəticəsində həlak olanların sayının doqquza çatdığı bildirilir.
Beşmərtəbəli bina fevralın 8-də səhər saatlarında Tripolinin Bab əl-Təbbanə məhəlləsində çöküb. Hadisə yerində axtarış-xilasetmə əməliyyatları fasiləsiz davam etdirilir.
Livanın Mülki Müdafiə İdarəsinin baş direktoru İmad Xreyx jurnalistlərə açıqlamasında dağıntılar altından 15 nəfərin çıxarıldığını, onlardan altısının sağ olduğunu bildirib.
"Anadolu" agentliyinin məlumatına görə, xilasetmə qrupları hələ də dağıntılar altında qaldığı güman edilən təxminən səkkiz nəfəri xilas etməyə çalışır.
Tripoli valisi Əbdül Həmid Kərim isə daha əvvəl verdiyi açıqlamada hadisə nəticəsində altı nəfərin öldüyünü, yeddi nəfərin isə yaralandığını qeyd etmişdi.
