Əfqanıstan rəsmiləri Pakistan hərbi hava qüvvələrinin paytaxt Kabil və bir neçə sərhədyanı əyalətə yeni zərbələr endirdiyini açıqlayıb. Kabil polisinin verdiyi məlumata görə, paytaxtın yaşayış məntəqələrinə təşkil edilən hücumlar nəticəsində 4 nəfər həyatını itirib, 15 nəfər isə yaralanıb.
Pakistanın təhlükəsizlik rəsmiləri gecə saatlarında həyata keçirilən əməliyyatları təsdiqləyərək, hədəfin "Pakistan Talibanı" (TTP) qruplaşmasının silahlıları olduğunu bildiriblər.
Rәsmi İslamabad bu addımı Pakistan daxilində artan terror hücumlarına qarşı mübarizə tədbirlərinin bir hissəsi kimi qiymətləndirib.
Talibanın Kabildəki administrasiyası hücumlarda hər hansı iştirakını qəti şəkildə təkzib edib. Hökumət sözçüsü Zəbihullah Mücahid bildirib ki, Pakistanın hərbi zərbələri ölkənin cənubundakı Qəndəhar, həmçinin Pakistanla sərhəddə yerləşən Paktiya və Paktika əyalətlərinə də təsir göstərib.
Pakistan tərəfi isə keçirdiyi əməliyyatların yalnız terrorçu qruplaşmaları hədəf aldığını və mülki şəxslər arasında itki olmadığını irəli sürdü. Lakin son həftələr ərzində sərhəd xətti boyunca Əfqanıstan və Pakistan qüvvələri arasında baş verən toqquşmalar ikitərəfli ticarət əlaqələrini iflic edib və sərhədyanı bölgələrdə yaşayan sakinləri yurd-yuvalarını tərk etmək məcburiyyətində qoyub.
Birləşmiş Millətlər Təşkilatının Əfqanıstandakı Missiyası (UNAMA) Pakistanın hərbi əməliyyatları ilə bağlı hesabat yayımlayıb. Hesabata görə, 26 fevral – 5 mart tarixləri arasında baş verən hücumlarda 24-ü uşaq olmaqla, ümumilikdə 56 mülki şəxs həyatını itirib. BMT-nin Qaçqınlar üzrə Agentliyi isə silahlı münaqişə səbəbindən təxminən 115 min insanın yurd-yuvasından didərgin düşdüyünü bəyan edib.
