Böyük Britaniyanın Hitrou hava limanı elektrik yarımstansiyasında baş verən yanğın nəticəsində elektrik enerjisinin kəsilməsinə görə bir günlük fəaliyyətini dəyandırıb. Vəziyyət Avropanın ən işlək hava limanlarından birində baş verib və nəticədə yüz minlərlə sərnişinin uçuş reysi ləğv edilib.

Buna görə də uçuşlar Gatwick, Şarl de Qoll (Paris) və Şennon (İrlandiya) hava limanlarına yönəldilib. Uçuş izləmə xidmətləri bu məlumatı təsdiqləyib.

Uçuş izləmə xidməti FlightRadar 24-ün paylaşdığı məlumata görə hadisə nəticəsində azı 1350 reys təsirlənib. Əlavə olaraq hava limanına gedən qatarların ləğv edildiyi də bildirilir.

“Sərnişinlərimizin və işçilərimizin təhlükəsizliyini təmin etmək üçün cümə günü hava limanını tam gün bağlamaqdan başqa çarəmiz yoxdur”, - deyə qurumun rəsmiləri bildirilib. "Yaxın günlərdə əhəmiyyətli nasazlıqlar gözləyirik və buna görə də sərnişinlər hava limanı açılana qədər səyahət etməməlidirlər."

Qeyd edek ki, Hitrou hava limanı bu ilin əvvəlində yanvar ayında 6,3 milyondan çox sərnişinlə rekord qırmışdı. Bu, ötən ilin müvafiq dövrü ilə müqayisədə 5 faizdən çox artım deməkdir. Yanvar həm də hava limanının gündə orta hesabla 200.000-dən çox sərnişinə xidmət göstərdiyi ardıcıl 11-ci aydır. Bu artıma transatlantik səyahətin böyük töhfə verdiyi bildirilib.

London yanğınsöndürmə briqadası bildirib ki, şəhərin qərbində elektrik yarımstansiyasında transformatorun alovlanmasından sonra baş verən hadisəyə böyük miqdarda texniki avadanlıq və təxminən 70 yanğınsöndürən cəlb olunub. Minlərlə ev işıqsız qalıb, 150-yə yaxın insan təxliyə edilib.

Yanğının səbəbi isə hələ də müəyyən edilməyib.