Dövlət rəsmiləri tərəfindən mayın 9-da verilən açıqlamada bildirilib ki, Konqo Demokratik Respublikasının şərqində yerləşən Cənubi Kivu vilayətində, Tanganika gölü ətrafındakı kəndləri əhatə edən güclü sel nəticəsində təxminən 62 adam həyatını itirib, 50 nəfər isə itkin düşüb.
Hadisə şahidləri bildiriblər ki, Ngandja bölgəsində yerləşən Kasaba kəndini su altında qoyan daşqın mayın 8-də yerli vaxtla səhər saat 5 radələrində baş verib. Güclü yağışlar selə səbəb olub, bu da evlərin su altında qalmasına və rabitə xətlərinin kəsilməsinə gətirib çıxarıb.
Cənubi Kivu vilayətinin səhiyyə naziri Teofil Valulika Muzaliva bildirib ki, axtarış və xilasetmə işləri ciddi şəkildə çətinləşib. Muzaliva "Arab News"la telefon danışığında deyib ki, “Sahə rəisləri, kənd başçıları və yerli idarəetmənin bir hissəsi olan digər yerli rəhbərlər hadisə yerindədir. Hal-hazırda bölgədə olan yeganə humanitar yardım təşkilatı Qırmızı Xaçdır. Meyitlərin axtarışı davam etdiyi üçün dəqiq qiymətləndirmə aparmaq mümkün deyil.”
Bu sel fəlakəti bir neçə həftə əvvəl paytaxt Kinşasada baş vermiş oxşar yağışların 33 nəfərin ölümünə səbəb olmasından sonra qeydə alınıb.
Son aylarda ölkə üzrə infrastruktur ciddi zərər görüb, bölgədəki silahlı münaqişələr isə humanitar yardım əməliyyatlarını daha da çətinləşdirir.
Fevral ayında hökumət qüvvələri ilə silahlı qruplar arasında baş verən döyüşlərin şiddətlənməsi, BMT-nin dünyanın ən ağır humanitar böhranlarından biri adlandırdığı vəziyyəti daha da pisləşdirib.
