Türkiyə Prezidenti Rəcəb Tayyib Ərdoğan Omanda səfərdədir. Prezident Ərdoğan səfər çərçivəsində paytaxt Maskatda Oman Sultanı Heysəm bin Tarık ilə görüşüb. Tərəflər sənaye, müdafiə və rabitə sahələrində ikitərəfli əməkdaşlığın gücləndirilməsini müzakirə ediblər. Liderlər həmçinin Fələstin məsələsində həmrəy olduqlarını vurğulayıb və regional, eləcə də qlobal məsələlər ətrafında fikir mübadiləsi aparıblar.
Türkiyə diplomatik mənbələrinin verdiyi məlumata görə, oktyabrın 22-də baş tutan görüş Maskatdakı Əl-Aləm sarayında mətbuata qapalı keçirilib.
Türkiyə Prezident Administrasiyasının İctimaiyyətlə Əlaqələr İdarəsinin yaydığı bəyanatda qeyd olunur ki, liderlər ikitərəfli əlaqələri, regional və qlobal məsələləri müzakirə ediblər.
Bəyanatda deyilir: “Prezident Rəcəb Tayyib Ərdoğan Türkiyə ilə Omanın köklü tarixi və qardaşlıq münasibətlərinə malik olduğunu, bu səfərin iki ölkə arasındakı həmrəyliyi daha da gücləndirdiyini bildirib. Dövlət başçısı Omanla əməkdaşlığın sənaye, iqtisadiyyat, müdafiə və kommunikasiya kimi sahələrdə inkişaf etdiriləcəyini vurğulayıb. Prezident Ərdoğan Türkiyə və Omanın bir çox məsələdə, xüsusilə də Fələstin məsələsində oxşar mövqelərə malik olduğunu, Omanın bölgədə vasitəçilik və dialoqa əsaslanan səylərini yüksək qiymətləndirdiklərini və Qəzzada iki dövlətli həll yolunun təşviqi istiqamətində birgə fəaliyyət göstərəcəklərini qeyd edib.”
Görüşün sonunda iki ölkə arasında ümumilikdə 16 yeni sənəd imzalanıb.
