Meksika prezidenti Klaudiya Şeinbaum ABŞ-ın Venesuelaya qarşı hərbi müdaxiləsini və prezident Nikolas Maduronun qaçırılmasını pisləyib, Latın Amerikasında istənilən xarici hərbi müdaxiləni qəti şəkildə rədd etdiklərini bildirib.
Yanvarın 4-də səhər keçirdiyi brifinqdə Şeinbaum Meksikanın hər növ xarici müdaxilələrə qarşı olduğunu vurğulayaraq, bu mövqenin həm Meksika Konstitusiyasına, həm də Birləşmiş Millətlər Təşkilatının Nizamnaməsinə əsaslandığını deyib.
“Biz başqa ölkələrin daxili işlərinə müdaxiləni qəti şəkildə rədd edirik. Latın Amerikasının tarixi açıq şəkildə göstərir ki, müdaxilə heç vaxt demokratiya gətirməyib, rifah yaratmayıb və davamlı sabitlik təmin etməyib”, -deyə Şeinbaum bildirib.
Nikolas Maduro və həyat yoldaşı Siliya Flores yanvarın 3-də ABŞ prezidenti Donald Trampın Karakasda bir neçə hədəfə hava zərbələri endirilməsi barədə göstərişindən sonra qaçırılıb. Venesuela rəsmilərinin məlumatına görə, hücumlar nəticəsində azı 80 nəfər həlak olub.
Meksikanın xarici işlər naziri Xuan Ramon de la Fuente də Vaşinqtonun addımlarını tənqid edib və BMT-nin passiv mövqeyini qınayıb. O bildirib ki, BMT birtərəfli və zorakı hərəkətlər qarşısında qəti addımlar atmaqda aciz qalıb.
“Birləşmiş Millətlər hələ də əsas çoxtərəfli platformamızdır və malik olduğumuz ən yaxşı qurumdur. Lakin təəssüf ki, bu gün hegemon güclərin sui-istifadələrini məhdudlaşdırmaqda təsirsiz olduğunu göstərdi. Beynəlxalq hüququn gündən-günə pozulmasını açıq şəkildə qınamaq gücünü itirib”, -deyə nazir vurğulayıb.
ABŞ-ın Venesuelaya müdaxiləsindən dərhal sonra Donald Tramp Meksika və Kolumbiya da daxil olmaqla digər Latın Amerikası ölkələrini mümkün hədəflər kimi göstərərək, bu ölkələri beynəlxalq narkotik qaçaqmalçılığının mərkəzləri olmaqda ittiham edib.
Meksika ilə bağlı açıqlamasında Tramp prezident Şeinbaumun narkokartellərdən “qorxduğunu” və ölkədə real hakimiyyətin bu qrupların əlində olduğunu iddia edərək, hərbi müdaxilə ehtimalına işarə edib.
Mətbuat konfransında Şeinbaum Venesueladakı kimi bir ssenarinin Meksika üçün mümkün olmadığını bildirərək, “Bir işğalın olacağına inanmıram. Hətta onların özlərinin belə bunu ciddi şəkildə düşündüyünü hesab etmirəm” deyib.
Şeinbaum əlavə edib ki, Tramp administrasiyası ABŞ ordusunun Meksika ərazisinə daxil olmasına icazə verilməsi ilə bağlı dəfələrlə təklif irəli sürüb, lakin Meksika hökuməti bu təklifləri qəti şəkildə rədd edib.
“Biz çox açıq və qəti şəkildə ‘xeyr’ dedik. Birincisi, suverenliyimizi qoruduğumuz üçün, ikincisi isə buna ehtiyac olmadığı üçün” -deyə Meksika Prezidenti bildirib.
