ABŞ-ın maliyyə naziri Skot Bessent sanksiya tətbiq olunmuş İran aviaşirkətləri ilə əməkdaşlıq edən qurumlara ciddi xəbərdarlıq edib. "X" sosial şəbəkəsində paylaşım edən nazir bildirib ki, İranın hava nəqliyyatı sektoruna xidmət göstərən istənilən şirkət ABŞ-ın məhdudlaşdırıcı tədbirləri ilə üzlə bilər.
S. Bessent bildirib ki, xarici hökumətlər öz ölkələrindəki şirkətlərin İran təyyarələrinə yanacaq verməsinin, qida ilə təmin etməsinin, texniki xidmət göstərməsinin və eniş icazəsi verməsinin qarşısını almaq üçün bütün lazımi tədbirləri görməlidirlər. O vurğulayıb ki, ABŞ Maliyyə Nazirliyi İrana qarşı "maksimum təzyiq" siyasətini davam etdirəcək və İran qurumları üçün əməliyyatlar təşkil edən üçüncü tərəflərə qarşı tədbir görməkdən çəkinməyəcək.
Bu xəbərdarlıq İranın bəzi kommersiya uçuşlarını bərpa etməsi fonunda səslənib.
Qeyd edək ki, İran dövlət televiziyası Tehrandan çoxsaylı təyyarələrin havaya qalxdığını, ölkənin hava məkanının bir hissəsinin və beynəlxalq tranzit yollarının yenidən açıldığını elan edib.
ABŞ Maliyyə Nazirliyi həmçinin İranın neft ticarəti ilə bağlı qlobal aktivləri hədəf alan “İqtisadi Qəzəb” adlı yeni proqramın başladıldığını açıqlayıb. Bu təşəbbüs çərçivəsində Vaşinqton artıq Çin banklarına məktublar göndərərək İranın neft əməliyyatlarına vasitəçilik etməyə davam edəcəkləri təqdirdə onların ikinci dərəcəli sanksiyalarla üzləşəcəyini bəyan edib. Skot Bessent ABŞ-nin İranın regiondakı təsirini zəiflətmək strategiyasında qərarlı olduğunu bir daha xatırladıb.
