Ukraynanın ABŞ-dakı səfiri Olqa Stefanişina prezident Donald Trampın Rusiyaya qarşı çoxdan gözlənilən sanksiyalarını alqışlayıb. Səfir bildirib ki, bu qərar Ukraynanın sülhün yalnız güc vasitəsilə və mövcud bütün beynəlxalq mexanizmlərdən istifadə edərək təcavüzkara maksimum təzyiq göstərməklə əldə oluna biləcəyi ilə bağlı ardıcıl mövqeyinə tam uyğundur.
Avropa Komissiyasının sədri Ursula fon der Leyen də ABŞ Maliyyə Departamentinin Rusiyanın iki neft şirkətlərinə qarşı sanksiya tətbiq etmək qərarını müsbət qarşılayıb. Rəsmi “X” səhifəsində paylaşım edən Leyen bildirib ki, bu gün ABŞ Maliyyə naziri Skott Bessentlə keçirdiyi görüşü və Rusiyanın iki neft şirkətlərinə sanksiya tətbiq edilməsi qərarını yüksək qiymətləndirir. O, həmçinin vurğulayıb ki, ABŞ sanksiyalarının Avropa İttifaqının Rusiyaya qarşı hazırladığı 19-cu sanksiya paketi ilə birləşməsi, Atlantikanın hər iki tərəfindən təcavüzkara qarşı birgə təzyiqin davam edəcəyinə dair açıq siqnal olacaq.
ABŞ oktyabrın 22-də Rusiyanın iki ən böyük neft şirkəti – “Rosneft” və “Lukoil”ə qarşı yeni sanksiyalar tətbiq edib və bu addımı rəsmi Moskvanın sülh prosesinə ciddi sadiqlik nümayiş etdirməməsi ilə əsaslandırıb.
ABŞ Maliyyə Departamenti bəyan edib ki, bu tədbirlər Rusiyanın enerji sektorunu hədəf alır və məqsəd Kremlin öz döyüş maşını üçün gəlir əldə etmək imkanlarını məhdudlaşdırmaq, eləcə də zəifləyən iqtisadiyyatını dəstəkləmək qabiliyyətini sarsıtmaqdır.
NATO-nun baş katibi Mark Rutte isə bildirib ki, Rusiya prezidenti Vladimir Putin davamlı beynəlxalq təzyiq vasitəsilə atəşkəs masasına oturmağa məcbur edilə bilər. Ağ Evdə ABŞ prezidenti Donald Tramp ilə keçirdiyi mətbuat konfransından sonra jurnalistlərə açıqlama verən Rutte qeyd edib ki, davamlı təzyiqlərlə Putini masaya oturdub atəşkəsi qəbul etdirə biləcəklərinə tam əmindir və bundan sonra gələcək danışıqların baş tutacağına inanır.
Mark Rutte deyib ki, Trampla Rusiya–Ukrayna müharibəsinin necə bitirilə biləcəyini, NATO-nun prosesə necə töhfə verəcəyini və Putini atəşkəsi qəbul etməyə razı salmaq üçün atılacaq addımları müzakirə ediblər. Rutte ABŞ prezidentini bu məsələdə güclü mövqeyinə və baxışına görə tərifləyərək qeyd edib ki, Tramp Putinlə oturub danışa, onun hesablamalarını dəyişə və müəyyən güzəştlər əldə edə biləcək yeganə liderdir.
NATO baş katibi həmçinin ABŞ-ın Ukrayna üçün təhlükəsizlik təminatlarına yenidən qoşulmasının vacibliyini vurğulayıb.
