Ukrayna Prezidenti Volodimir Zelenski bildirib ki, Rusiya-Ukrayna müharibəsinə son qoymaq üçün mümkün sülh çərçivəsinin ən həssas detalları birbaşa ABŞ Prezidenti Donald Trampla müzakirə ediləcək.

Rəsmi X sosial media platformasında paylaşım edən Zelenski deyib:
"Bu gün nümayəndə heyətimiz Cenevrədən qayıtdı. Müharibəyə son qoymaq üçün lazım olan addımların siyahısı artıq mövcud ola bilər. Cenevrədə keçirilən görüşdən sonra maddələrin sayı azalıb və bu çərçivədə detalların çoxu nəzərdən keçirilib. Komandamız yeni addımlar barədə məlumat verib və bu həqiqətən də düzgün yanaşmadır. Mən Prezident Trampla həssas məsələləri müzakirə edəcəyəm’’.

Volodimir Zelenski yaydığı başqa bir paylaşımda Rusiyanın təzyiqini davam etdirəcəyi barədə xəbərdarlıq edib.
"Rusiyanın Ukraynaya təzyiqini azaltmayacağını bilməliyik. Bu günlərdə və həftələrdə hava hücumları və digər oxşar hücumlarla bağlı xəbərdarlıqları çox ciddi qəbul etmək vacibdir. Kiminlə məşğul olduğumuzu aydın başa düşürük. Ukraynaya və xalqımıza qarşı raketlər, kütləvi hücumlar olmamalıdır. Buna yalnız dünyada həqiqətən güclü olanlar nail ola bilər. Amerikadan çox şey asılıdır. Müharibəni Rusiya başlatdı və ona son qoymalı olan da Rusiyadır. Bunun üçün tərəfdaşlarımızla dialoq yolu ilə lazımi şərait yaradırıq".

Ağ Ev bildirib ki, rəsmi Vaşinqton və Kiyev arasında danışıqlar məhsuldar davam edir. Ağ Evin mətbuat katibi Karolin Levit isə ‘‘Fox News’’a açıqlamasında deyib ki, ABŞ və Ukrayna arasında potensial razılaşma ilə bağlı yalnız bir neçə mübahisəli məqam mövcuddur.

Karolin Levit qeyd edib ki, Tramp razılaşmanın əldə edilə biləcəyinə nikbin baxır və müxtəlif dairələrin, o cümlədən Respublikaçılar Partiyasının Trampın Rusiyaya üstünlük verməsi ilə bağlı tənqidlərini rədd edib.