İranın Ali dini liderinin hərbi müşaviri Möhsün Rzayi ABŞ-ın İran limanlarına tətbiq etdiyi blokadanın uğursuzluğa məhkum olduğunu bəyan edib. Rzayi Tehranın blokadanı yarmaq üçün kifayət qədər variantının olduğunu vurğulayaraq mühasirənin davam edəcəyi təqdirdə İranın hərbi gücdən istifadə edə biləcəyini bildirib. O, mümkün müharibə ssenarilərindən də bəhs edərək, hərbi əməliyyatların cənub sahillərindən İsfahana qədər uzana biləcəyini, ölkənin qərbində fəallığın artacağını və Tehranda sui-qəsd, yaxud bombalama cəhdlərinin baş verə biləcəyi barədə xəbərdarlıq edib.

Xatırladaq ki, fevralın 28-də ABŞ və İsrailin İrana qarşı başlatdığı birgə hücumlardan sonra tərəflər arasında genişmiqyaslı toqquşmalar qeydə alınmışdı. Aprelin 8-də Pakistanın vasitəçiliyi ilə elan edilən iki həftəlik atəşkəsə qədər davam edən bombardmanlar nəticəsində 3300-dən çox insan həyatını itirib. Aprelin 22-də bitməsi nəzərdə tutulan bu atəşkəs rejimi Pakistanın Baş naziri Şahbaz Şərif və Qərargah rəisi Asim Munirin müraciətindən sonra ABŞ Prezidenti Donald Tramp tərəfindən qeyri-müəyyən müddətə uzadılıb. Buna baxmayaraq Tehranın limanların blokadaya alınmasına verdiyi sərt reaksiya regionda kövrək olan sülhün yenidən pozulma riskini gündəmə gətirib.