Fələstin xarici işlər naziri Varsen Ağabekyan Şahin İsrailin işğalçılıq siyasəti və qanunsuz məskunlaşma fəaliyyətlərinə qarşı beynəlxalq münasibətin köklü şəkildə dəyişdiyini bəyan edib. Anadolu Agentliyinə müsahibə verən nazir qeyd edib ki, hazırda dünyada İsrailin beynəlxalq təcridinə doğru artan bir meyl və Fələstin xalqına qarşı güclənən rəğbət müşahidə olunur.
Varsen Şahin xüsusilə İspaniya və Almaniya kimi ölkələrin İsrailin işğalını və məskunlaşma zorakılığını tənqid etməkdə daha qətiyyətli mövqe nümayiş etdirdiklərini, Hollandiyanın da oxşar istiqamətdə irəlilədiyini bildirib. Nazir bu diplomatik dəyişikliyi "mənalı" adlandırsa da, mövcud reaksiyaların hələ də tələb olunan səviyyədə olmadığını və bu prosesin yerində konkret tədbirlərlə sürətləndirilməsinin vacibliyini diqqətə çatdırıb.
Nazir İsrailin beynəlxalq hüququ pozmağa davam etməsinin əsas səbəbi kimi rəsmi Tel-Əvivin hər hansı ciddi sanksiya və ya ağır nəticə ilə üzləşməməsini göstərib. Beynəlxalq ictimaiyyəti İsraili məsuliyyətə cəlb etmək üçün hüquqi prosesləri sürətləndirməyə və sanksiyalar tətbiq etməyə çağıran Şahin Beynəlxalq Cinayət Məhkəməsinin İsrail rəsmiləri barəsində çıxardığı həbs qərarlarının hələ də icra olunmamasını tənqid edib. O, bu vəziyyəti beynəlxalq hüquq sisteminin ümumi uğursuzluğu kimi xarakterizə edərək bildirib ki, real bir cəza mexanizmi tətbiq edilməyənə qədər İsrail mövcud siyasətindən geri çəkilməyəcək.
Varsen Şahin işğal altındakı İordan çayının qərb sahilində vəziyyətin sürətlə pisləşdiyini, yaşayış məntəqələrinin genişləndiyini və qanunsuz məskunlaşanların hücumlarının artdığını bildirib. İlhaq prosesinin artıq gələcək bir ssenari deyil, acı bir reallıq olduğunu vurğulayan nazir, bu vəziyyətin müstəqil Fələstin dövlətinin qurulması ümidlərini ciddi şəkildə təhdid etdiyini qeyd edib.
Qəzzadakı humanitar vəziyyəti "fəlakətli" kimi qiymətləndirən Şahin humanitar yardımların hələ də qeyri-kafi olduğunu və səhiyyə sisteminin tamamilə çökmək təhlükəsi ilə üzləşdiyini diqqətə çatdırıb. İsrailin Fələstinə məxsus vergi gəlirlərini saxlaması nəticəsində İordan çayının qərb sahilində dərinləşən iqtisadi böhrana toxunan nazir bir çox ailənin əsas ehtiyaclarını qarşılaya bilmədiyini vurğulayıb.
Türkiyənin rolunu xüsusi qeyd edən nazir, Ankaranın göstərdiyi güclü siyasi və humanitar dəstəyi yüksək qiymətləndirib. Türkiyənin yardımlarının və beynəlxalq platformalardakı müdafiəsinin bölgədə real təsir yaratdığını bildirən Şahin göstərilən bu həmrəyliyə görə həm Türkiyə hökumətinə, həm də türk xalqına təşəkkürünü bildirib. O, bu dəstəyin fələstinlilərin mövcud çətinliklər qarşısında müqavimət gücünü artırdığını vurğulayıb.
