İsrail mediası xəbər verir ki, israilli yüksək vəzifəli hərbi rəsmilər Baş nazir Benyamin Netanyahunun yaxınlaşan parlament seçkilərini təxirə salmaq məqsədilə Qəzzadakı vəziyyəti daha da gərginləşdirməyə çalışdığından şübhələnirlər.

Bu barədə İsrailin gündəlik "Maariv" qəzeti İsrail ordusu rəhbərliyində aparılan qiymətləndirmələrə istinadən məlumat yayıb. Məlumatda B.Netanyahunun mövcud müharibələrin bitməsini istəmədiyi qeyd olunub. Həmçinin onun seçkilər yaxınlaşdıqca Qəzzada gərginliyi yenidən artırmağa çalışa biləcəyi diqqətə çatdırılıb.

Xəbərə əsasən, yüksək vəzifəli hərbi rəsmilər siyasi maraqların yeni hərbi əməliyyatlarla bağlı qərarlara getdikcə daha çox təsir etməsindən narahatdırlar.

Ölkənin ordu rəsmiləri bəyanat yayaraq real təhlükəsizlik zərurəti yaranmadıqca yeni bir münaqişəyə daxil olmaq istəmədiklərini bildiriblər. Ordu rəsmiləri "Biz yeni və əsassız bir müharibədə iştirak etməyəcəyik", - deyə qeyd ediblər.