Yanvarın 5-də Tokionun Toyosu balıq bazarında keçirilən ilin ilk hərracında tuna balığı 510,3 milyon yenə (təxminən 3,2 milyon dollar) satılıb.

Yaponiyanın şimal-şərqindəki Aomori prefekturasının Oma sahillərində tutulan 243 kiloqramlıq mavi üzgəcli tuna balığını məşhur “Sushizanmai” suşi şəbəkəsini idarə edən ‘‘Kiyomura Corp’’ alıb.

‘‘Kiyomura’’ şirkətinin sədri Kiyoşi Kimura “Kyodo” xəbər agentliyinə verdiyi müsahibədə deyib: “İlin ilk tuna balığı uğurlar gətirir. Ümid edirik ki, mümkün qədər çox insan onu yeyəcək və özlərini təravətlənmiş hiss edəcəklər’’.

Balıq “Sushizanmai”nin Tsukiji filialında dilimlənəcək və ölkə daxilindəki digər filiallara paylanacaq. Rekord qiymətə baxmayaraq, şirkət tuna balığını müştərilərə normal qiymətə satacağını açıqlayıb.

Hərracda müxtəlif tuna növləri təqdim olunub və alıcılar ilə satıcılar arasında canlı qarşılıqlı əlaqələr diqqəti cəlb edib. Hər il keçirilən hərracı izləmək üçün çox sayda xarici turist də gəlir.

Alıcılar ənənəvi olaraq ilin ilk hərracında böyük məbləğlər xərcləyirlər. Bunun uğur gətirdiyinə və restoranlar üçün marketinq imkanları yaratdığına inanılır.