İsrailin “Channel 12” telekanalının yaydığı xəbərə görə, Argentina İsrailin baş naziri Benyamin Netanyahu ilə Argentina prezidenti Xavyer Milyu arasında yaranan son gərginlikdən sonra İsraildəki səfirliyini Qüdsə köçürmək planlarını dayandırıb.
Telekanal “Times of Israel” qəzetinə istinadən bildirib ki, gərginlik İsrailin “Navitas Petroleum” şirkətinin Folklend adaları yaxınlığında dənizdə neft qazma işlərinə başlamaq planları ilə əlaqədardır.
Qeyd edək ki, Folklend adaları Böyük Britaniya tərəfindən xarici ərazi kimi idarə olunsa da, Argentina bu adalar üzərində suverenlik iddia edir və onları Malvin adaları adlandırır.
Dekabr ayında Argentina “Navitas Petroleum” və mərkəzi Böyük Britaniyada yerləşən “Rockhopper Exploration” şirkətlərini adalar yaxınlığında təxminən 2,1 milyard dollar dəyərində mübahisəli dəniz neft layihəsi elan etdiklərinə görə sərt tənqid edib.
“Rockhopper Exploration” şirkətinin fəaliyyəti Argentina tərəfindən cinayət hesab edildiyinə görə, şirkətin 2013-cü ildən etibarən ölkədə fəaliyyəti qadağan olunub. “Navitas Petroleum” isə 2022-ci ildə icazəsiz qazma işləri apardığı üçün eyni şəkildə qadağaya məruz qalıb.
BMT-nin 1976-cı il qətnaməsinə əsasən, suverenlik danışıqları davam etdiyi müddətdə nə Argentina, nə də Böyük Britaniya regionda birtərəfli addımlar atmamalıdır.
“Channel 12”nin məlumatına görə, İsrailin xarici işlər naziri Gideon Saar Argentina rəsmilərinə İsrail hökumətinin “Navitas” şirkətinin fəaliyyətində heç bir rolunun olmadığını və səhmləri açıq şəkildə satılan bu şirkətə nəzarət etmədiyini izah etməyə çalışıb.olacaqdı.
