Rusiyanın dövlət agentliyi RİA-nın verdiyi məlumata görə, bu gün Azərbaycanda məhkəmə Fransaya casusluq etməkdə təqsirli bilinən Fransa vətəndaşı Martin Ryanı (Martin Ryan) 10 il müddətinə azadlıqdan məhrum edib.

2023-cü ilin dekabrında saxlanılan Ryanın Azərbaycanın Türkiyə və Pakistan ilə apardığı hərbi əməkdaşlıq barədə məxfi məlumatlar topladığı iddia edilir.

Rəsmi Bakı həmçinin iddia edib ki, Ryan Fransa kəşfiyyatı ilə əməkdaşlıq etmək məqsədilə fransızdilli Azərbaycan vətəndaşlarını əməkdaşlığa cəlb etməyə çalışıb.

Ryan ona qarşı irəli sürülən ittihamları qismən qəbul edib.

Qeyd edək ki, bu ayın əvvəlində Fransa Prezidenti Emmanuel Makron ilə Azərbaycan Prezidenti İlham Əliyev arasında telefon danışığı baş tutub. Əliyevin ofisindən verilən açıqlamaya görə, görüşdə ikitərəfli münasibətlərin yenidən canlandırılması və əməkdaşlıq imkanları müzakirə olunub.

Əliyev oktyabr ayında Kopenhagendə Makron ilə keçirdiyi görüşdən sonra iki ölkə arasındakı "keçmişdəki anlaşılmazlıqların aradan qaldırıldığını" bildirib.