İran İslam İnqilabı Keşikçiləri Korpusu (SEPAH) ABŞ Prezidenti Donald Trampın münaqişənin tezliklə bitə biləcəyi ilə bağlı bəyanatlarına cavab olaraq, Yaxın Şərqdəki müharibənin taleyini özlərinin müəyyən edəcəyini açıqlayıb. Martın 10-da yayılan bəyanatda vurğulanıb ki, bölgənin gələcək statusu artıq İran silahlı qüvvələrinin nəzarətindədir və müharibənin necə və nə vaxt bitəcəyinə Amerika qərar verə bilməz.

İran mediasının məlumatına görə, SEPAH rəsmiləri bildiriblər ki, ABŞ və İsrailin hücumları davam edəcəyi təqdirdə bölgədən neft ixracına icazə verilməyəcək. SEPAH-ın sözçüsü qeyd edib ki, ölkəyə qarşı hərbi təzyiqlər dayandırılmasa, Hörmüz boğazından bir litr belə neftin daşınmasına imkan verilməyəcək.

Donald Tramp isə öz növbəsində Tehranın neft daşınmasını dayandırmaq cəhdlərinə sərt reaksiya verərək boğazda hər hansı maneə yaratmağın İrana "ölüm, atəş və qəzəb" gətirəcəyini bildirib. Tramp bildirib ki, belə bir addım atılarsa, cavab zərbələri indikindən iyirmi dəfə daha güclü olacaq.

Bu gərginlik fonunda İran İslam İnqilabı Keşikçiləri bölgədə ABŞ-a məxsus 10 qabaqcıl radar sistemini və bir neçə bahalı pilotsuz uçuş aparatını (PUA) məhv etdiklərini bəyan ediblər.

SEPAH həmçinin Donald Trampı İranın hərbi gücünün zəifləməsi ilə bağlı ictimaiyyəti çaşdırmaqda və "yalan iddialar" səsləndirməkdə ittiham edib.

Rəsmi Tehran raket buraxılışlarının azaldılması barədə xəbərləri təkzib edərək, bir tondan ağır döyüş başlığı daşıyan daha güclü raketlərin istifadə olunduğunu diqqətə çatdırıb.