Türkiyənin Mədəniyyət və Turizm Nazirliyi Berlində keçiriləcək sərginin Göbəklitəpənin qlobal miqyasda tanınmasını vurğuladığını bildirərkən, şəhərin “Muzey adası” adlanan bölgəsindəki layihə ilə yanaşı, xaricdə başqa tədbirlərin də planlaşdırıldığını açıqlayıb. Türkiyənin cənub-şərqində yerləşən və UNESCO-nun Dünya İrsi Siyahısında olan Göbəklitəpə 2026-cı ildə 96 parçadan ibarət xüsusi bir seçki ilə Almaniyada sərgilənəcək.
Türkiyə mədəniyyət və turizm nazirinin müavini Gökhan Yazğı “Anadolu” agentliyinə verdiyi açıqlamada, nazirliyin Göbeklitəpəni həm Türkiyədə, həm də xaricdə tanıtmaq üçün eyni vaxtda layihələr həyata keçirdiyini bildirib.
G.Yazğı ötən il Romadakı Kolizeydə təşkil olunan “Göbəklitəpə: Müqəddəs bir yerin sirri” sərgisini xatırladaraq, həmin sərginin 6 milyondan çox ziyarətçi cəlb etdiyini vurğulayıb.
Bu dəfə isə Göbəklitəpənin Berlində “Daşdakı miflər: Göbəklitəpə və son ovçuların dünyası” başlığı altında təqdim ediləcəyini qeyd edən G.Yazğı Neolitik irsin tanıdılması istiqamətində addımların sürətləndiyini ifadə edib.
“Daş Təpələr Layihəsi dünyada bənzəri olmayan bir layihədir. Bu layihə ilə Göbəklitəpə artıq dünya turizm ədəbiyyatında və arxeologiya sahəsində çox daha fərqli bir mövqeyə sahib olub. Bu il indiyə qədər 500 mindən çox ziyarətçi qəbul etdik və ziyarətçi sayı hər gün artmaqda davam edir”, – deyən G.Yazğı Göbəklitəpənin Neolit dövründəki rolunu və dünya arxeologiyasındakı yerini vurğulamaq üçün xüsusi bir sərgi hazırlandığını bildirib.
G.Yazğı əlavə edib: “Göbəklitəpənin dünya arxeologiyasındakı yerini, Daş Təpələr Layihəsinin nə qədər xüsusi bir layihə olduğunu bütün dünyaya tanıdacağıq. Ölkəmizin və şəhərimizin turizmdə layiq olduğu yeri alması üçün əlimizdən gələni edəcəyik.”
Berlindəki sərginin Göbəklitəpənin qlobal təqdimat üçün yekun mərhələ olduğunu vurğulayan G.Yazğı nazirliyin Berlindəki “Muzey adası”nda böyük bir layihəyə başlayacağını və digər ölkələrdə də oxşar təqdimat tədbirləri planlaşdırıldığını bildirib.
G.Yazğı deyib: “Ölkəmizin mədəni turizminə töhfə verən bu bənzərsiz zənginliyin dünya miqyasında tanınması üçün ciddi səy göstəririk.”
Almaniyanın Avropadakı mərkəzi mövqeyinə diqqət çəkən nazir müavini, sərginin arxeologiya həvəskarlarından ibarət geniş bir auditoriyanı əhatə edəcəyini qeyd edib.
Sərgidə Göbəklitəpədə yerləşən üç əsərin nüsxəsi, Göbəklitəpə Qarşılama Mərkəzində ziyarətçilərə təqdim edilən filmlərdən müxtəlif dillərdə fraqmentlər, rəqəmsal işlər və məlumat panellərinin yer alması planlaşdırılır.
Qeyd edək ki, sözügedən sərgi 2026-cı ilin fevralında açılacaq və altı ay müddətində ziyarətçilərin ixtiyarında olacaq.
