Ukrayna prezidenti Volodimir Zelenski bildirib ki, Kiyev ABŞ prezidenti Donald Trampla görüşə hazırlıqları tamamlayıb. Görüş zamanı hərbi və iqtisadi məsələlərin müzakirə olunacağı qeyd olunub.
Zelenski görüşün Rusiya ilə müharibənin dayandırılmasına töhfə verə biləcəyini vurğulayıb və hazırlıq prosesinə dəstək göstərən tərəfdaşlara təşəkkürünü bildirib.
“Amerika Birləşmiş Ştatları qlobal təsirə malik ölkədir və biz digər dövlətlərin də bu təşəbbüsdə bizimlə birgə olmasını təmin etmək üçün əlimizdən gələni edirik. Baş nazir, prezident aparatının rəhbəri və digər yüksək vəzifəli şəxslərdən ibarət Ukrayna nümayəndə heyəti artıq Vaşinqtondadır. Onlar görüşün əsasını hazırlamaq və ABŞ müdafiə və enerji şirkətləri ilə danışıqlar aparmaq məqsədilə oradadırlar’’, – deyə Volodimir Zelenski söyləyib.
Zelenski həmçinin bildirib ki, Ukrayna Mərkəzi, Cənubi və Şimali Avropadakı tərəfdaşları ilə birlikdə Amerika silahlarının birgə alınması üçün “Prioritetləşdirilmiş Ukrayna Tələblər Siyahısı” (PURL) təşəbbüsünü irəli sürür.
O, Böyük Britaniyaya Rusiyanın ən böyük neft şirkətlərinə qarşı tətbiq etdiyi yeni sanksiyalara görə təşəkkür edib. Eyni zamanda Yunanıstana davamlı dəstəyə görə minnətdarlığını bildirib və baş nazir Kiriakos Mitsotakislə enerji əməkdaşlığı mövzusunda telefon danışığı apardığını qeyd edib.
Sanksiyalar Rusiyanın “Rosneft” və “Lukoyl” şirkətlərini hədəf alır. Rusiya isə sanksiyaları pisləyib və onların əks nəticə verə biləcəyi barədə xəbərdarlıq edib.
“Rusiyanın aparıcı neft və qaz şirkətlərinə qarşı hücumlar qlobal enerji bazarlarında sabitliyi pozur və bu, bütün dünya üzrə istehlakçılara, Böyük Britaniya sakinlərinə və yerli biznesə mənfi təsir göstərir,” – deyə Rusiyanın Böyük Britaniyadakı səfirliyi bəyan edib.
Səfirlik əlavə edib ki, Böyük Britaniyanın bu hərəkətləri Qlobal Cənubda enerji təhlükəsizliyini daha da pisləşdirəcək.
Eyni zamanda, səfirlik bildirib ki, bu addımlar Ukrayna qüvvələrinin döyüş meydanındakı vəziyyətinin pisləşməsi ilə bağlı Britaniya administrasiyasının artan çarəsizliyindən qaynaqlanır.
