ABŞ Maliyyə Nazirliyi İranın Fars Körfəzi Boğazları İdarəsinə qarşı sanksiyalar tətbiq edib. Vaşinqton bu qurumu Hörmüz boğazından keçən kommersiya gəmilərini qanunsuz rüsum ödəməyə məcbur etməkdə ittiham edib.

Maliyyə Nazirliyinin çərşənbə günü yaydığı bəyanatda bildirilir ki, sözügedən idarə gəmiləri boğazdan təhlükəsiz keçid müqabilində "qanunsuz tranzit haqları" ödəməyə və həssas məlumatları bölüşməyə məcbur edir. Toplanan bu vəsaitlər isə birbaşa İslam İnqilabı Keşikçiləri Korpusunun hesabına köçürülür. ABŞ-ın maliyyə naziri Skott Bessent məsələ ilə bağlı bildirib ki, İran ordusunun qlobal dəniz ticarətindən xərac almaq istəyi Vaşinqtonun həyata keçirdiyi "İqtisadi Qəzəb Əməliyyatı" nəticəsində Tehran rejiminin ciddi nağd pul böhranı yaşadığının sübutudur. Nazirlik həmçinin vurğulayıb ki, bu qurumla əməkdaşlıq edən, o cümlədən nağd pul, rəqəmsal aktivlər, qeyri-rəsmi barter və ya digər ödəniş üsulları ilə tranzit haqları ödəyən istənilən şəxs və ya şirkət ABŞ sanksiyaları ilə üzləşə bilər.

ABŞ və İsrailin fevral ayında İrana endirdiyi zərbələrdən sonra regionda gərginlik kəskin artıb. Tehran buna cavab olaraq İsrail və ABŞ-nin Körfəzdəki müttəfiqlərinə məxsus hədəflərə hücumlar təşkil edib və Hörmüz boğazını bağlayıb. Daha sonra Pakistanın vasitəçiliyi ilə aprelin 8-də tərəflər arasında atəşkəs əldə olunub və bu razılaşma ABŞ Prezidenti Donald Tramp tərəfindən uzadılıb.

Qeyd edək ki, Hörmüz boğazı ABŞ-İsrail və İran arasındakı hərbi gərginliyin əsas mərkəzi hesab olunur. Bu qarşıdurma regional enerji axınına ciddi ziyan vuraraq qlobal neft qiymətlərinin yüksəlməsinə səbəb olub. Dünya neft tədarükünün təxminən 20 faizinin keçdiyi bu strateji marşrutda təhlükəsizlik risklərinin artması həm dəniz daşımaları, həm də sığorta xərclərini əhəmiyyətli dərəcədə yüksəldib.