Türkiyənin ətraf mühit, şəhərsalma və iqlim dəyişikliyi naziri Murat Kurum Aralıq dənizində indiyədək həyata keçirilən ən böyük ekoloji mühafizə layihəsinin Fəthiyədə başladığını elan edib.
Türkiyə Ətraf Mühit Agentliyi (TÜCA) tərəfindən dəniz ekosistemini qorumaq məqsədilə hazırlanan DERİA sistemi haqqında məlumat verən nazir dəniz dibinin palçıqdan təmizlənəcəyini bildirib.
Mövzu ilə bağlı sosial media hesabında paylaşım edən Murat Kurum dənizlərin təbii gözəlliyini gələcək nəsillərə ötürmək niyyətində olduqlarını vurğulayıb:
"Fəthiyədə dəniz ekosistemini təhdid edən 16,2 milyon kubmetr palçığı təmizləyirik. Dəniz otlarını qoruyan və lövbər salma zərurətini aradan qaldıran Mapa-Buoy sistemini tətbiq edirik. Bununla da qayıqların nəzarətsiz lövbər salmasının qarşısını alır və dəniz nəqliyyatını nizamlayırıq’’.
