Kişilərdən ibarət Almaniya basketbol millisi sentyabrın 14-də Türkiyə komandasını 88–83 hesabı ilə məğlub edərək “FIBA EuroBasket” turnirinin qalibi olub.

“Arena Riga”da keçirilən həyəcanverici qarşılaşmada hər iki milli komanda amansız mübarizə aparıb. Qarşılaşmanın ən məhsuldar oyunçusu isə 28 xalla Türkiyə millisindən Alperen Şengün olub.

İlk yarını 46–40 hesabı ilə öndə başa vuran Türkiyə milli komandası oyunun tempini qoruyaraq qarşılaşmada nəzarəti qoruya bilib.

Lakin Almaniya millisi üçüncü hissədə 26–21-lik seriya ilə geri dönüş edib.

Almaniya adına Dennis Şroder 16 xal və 12 asistlə “double-double” göstəricisinə nail olub. İsak Bonqa 20 xal, Frans Vaqner isə 18 xal və 8 ribaundla millinin qələbəsinə töhfə verib.

Türkiyə millisində isə Cedi Osman 23 xal toplayıb, Şeyn Larkin 13 xal, 6 ribaund və 9 asistlik nəticə əldə edib. Adem Bona isə milli komanda üçün 12 xal qazandırıb.

Qeyd edək ki, “FIBA EuroBasket” tarixində Almaniya ikinci dəfə çempionluq əldə edib.

Almaniya bundan əvvəl ən böyük uğurunu 1993-cü ildə çempion olaraq qazanmışdı. Türkiyə isə ən yaxşı nəticəsini 2001-ci ildə finala çıxaraq göstərmişdi.

Turnirdə bürünc medalın qalibi isə sentyabrın 14-də keçirilən görüşdə Finlandiyanı 89-92 hesabı ilə məğlub edən Yunanıstan olub.