Almaniya kansleri Fridrix Merts rəsmi Berlinin Türkiyənin Avropa İttifaqının tam hüquqlu üzvü olmasını istədiyini və Türkiyənin xarici siyasətdəki vacib rolunu qeyd edib. Merts bildirib ki, o, Prezident Rəcəb Tayyib Ərdoğana Avropa səviyyəsində strateji dialoqa başlamaq istədiyini söyləyib. Paytaxt Ankarada Ərdoğanla keçirdiyi mətbuat konfransında çıxış edən Fridrix Merts deyib: "Biz bu müzakirələri davam etdirmək istəyirik’’.

O, dünyanın böyük güclərin qlobal siyasəti formalaşdıracağı yeni geosiyasi mərhələyə qədəm qoyduğunu qeyd edərək deyib: "Almanlar və avropalılar olaraq strateji tərəfdaşlığımızı dərinləşdirməliyik və Türkiyə bu prosesdən kənarda qala bilməz’’.

Merts həmçinin vurğulayıb ki, Türkiyə bizi maraqlandıran bütün xarici siyasət və təhlükəsizlik məsələlərində çox vacib bir aktyordur. O, Almaniyanın təhlükəsizlik siyasəti mövzusunda Türkiyə ilə daha sıx əməkdaşlıq edəcəyinə söz verib.

Kansler Qəzzadakı vəziyyəti də müzakirə etdiklərini bildirib. O, girovların azad edilməsi ilə atəşkəs mövzusunda əldə olunan irəliləyişi müsbət inkişaf kimi qiymətləndirib. "İlk dəfə olaraq davamlı sülhə ümid var’’ deyən Merts Qəzzada sülhün təmin olunmasındakı roluna görə Ərdoğana təşəkkür edib.

"Bu proses Türkiyə, Qətər, Misir və ABŞ olmadan mümkün olmazdı’’,-deyə Fridrix Merts vurğulayıb.

Almaniyanın sülhü qorumaq üçün əlindən gələni edəcəyini bildirən kansler alman zabitlərinin ilk dəfə olaraq İsrailin cənubundakı mülki-hərbi mərkəzə yerləşdirildiyini qeyd edib.

Almaniyanın İsrailə dəstəyinin Holokostdan qaynaqlanan günahkarlıq hissinə əsaslanıb-əsaslanmadığı barədə sualı cavablandıran Merts deyib: "Federal hökumət qurulduğu gündən bəri İsrailin yanında olub. İsrail Holokostdan sağ çıxan milyonlarla yəhudi üçün sığınacaq olub. Almaniya həmişə İsrailin yanında olacaq."

Fridrix Merts Türkiyənin ‘‘Eurofighter Typhoon’’ təyyarələrini almaq qərarından məmnunluğunu ifadə edib. "Bu təyyarələr ortaq təhlükəsizliyimizə xidmət edəcək. Strateji dialoqu yenidən başladacaq’’,-deyə Fridrix Merts vurğulayıb.

Türkiyə ilə Almaniya arasında Əmək Sazişinin 64-cü ildönümünü qeyd edən Merts Almaniyaya iş üçün gələnlərə təşəkkür edib: "Bu insanlar olmasaydı, Almaniya 60 il əvvəl əldə etdiyi iqtisadi inkişafa nail ola bilməzdi’’.

Avropada artan ksenofobiya ilə bağlı suala cavab verən Merts bildirib ki, Almaniya və Avropa hər hansı səbəbdən asılı olmayaraq bu vəziyyətə qarşı mübarizə aparır.