Livan Milli Xəbər Agentliyinin məlumatına görə, İsrail ordusu atəşkəsin uzadılması barədə qərardan cəmi bir neçə saat sonra ölkənin cənubuna hava və artilleriya zərbələri endirib.
Döyüş təyyarələri Mərcayun rayonunun Tulin kəndində yaşayış evinə zərbə endirib, daha sonra ərazi artilleriya atəşinə tutulub. Hava hücumları zamanı həmçinin Xerbet Selm və Məcdəl Zunun yaşayış məntəqələrinin, eləcə də Cezzin ərazisindəki Rihan yüksəkliklərin hədəf aldığı bildirilir.
Hücumlar ABŞ Prezidenti Donald Trampın Ağ Evdə keçirilən diplomatik görüşlərdən sonra İsrail və Livan arasındakı atəşkəsin daha üç həftə müddətinə uzadıldığını elan etməsindən sonra baş verib.
Qeyd edək ki, aprelin 16-da qüvvəyə minmiş 10 günlük ilkin atəşkəs rejiminin bu bazar günü başa çatması gözlənilirdi.
İsrailin BMT-dəki nümayəndəsi Denni Danon Trampın bəyanatından qısa müddət sonra verdiyi müsahibədə atəşkəsin hələ tam rəsmiləşmədiyini vurğulayıb. O, hazırkı vəziyyətin əvvəlki dövrlə müqayisədə daha yaxşı olduğunu desə də, əsas problemin Livan hökumətinin ölkənin cənubunda suverenlik yaratmaq və sülh şərtlərini tətbiq etmək qabiliyyəti ilə bağlı olduğunu qeyd edib.
Livan rəsmilərinin son məlumatına əsasən, martın 2-dən bəri davam edən hücumlar nəticəsində ölkədə 2200-dən çox insan həyatını itirib, 1 milyondan çox sakin isə ev-eşiyindən didərgin düşüb.
