Somali Müdafiə Nazirliyi fevralın 9-da Somali və Səudiyyə Ərəbistanı arasında müdafiə və hərbi sahədə əməkdaşlıq müqaviləsinin imzalandığını açıqlayıb. Sənəd Qırmızı dəniz bölgəsində təhlükəsizlik əlaqələrini genişləndirmək və regional sabitliyi gücləndirmək məqsədi daşıyır.
Anlaşma memorandumu Ər-Riyadda Somali Müdafiə naziri Əhməd Müəllim Fiqi və onun səudiyyəli həmkarı şahzadə Xalid bin Salman tərəfindən imzalanıb. Nazirlik müqavilənin bir neçə hərbi sahəni əhatə etdiyini bildirsə də, sazişin detalları barədə ətraflı məlumat verməyib.
Somali mediası bu sənədi Qırmızı dəniz və Afrika Buynuzu ətrafındakı geosiyasi rəqabət fonunda regional təhlükəsizliyə yönəlmiş genişmiqyaslı strateji tərəfdaşlığın mühüm göstəricisi kimi qiymətləndirib.
Bu müqavilə Moqadişonun hava məkanını qorumaq və ərazi bütövlüyünü təmin etmək üçün müttəfiqlərindən təlim və hərbi texniki dəstək gözlədiyi bir vaxtda imzalanıb.
