Venesuela Milli Assambleyasının sədri Xorxe Rodriges bildirib ki, ötən həftə sülh jesti kimi elan edilən proses çərçivəsində 400-dən çox məhbus azadlığa buraxılıb.

Lakin insan hüquqları təşkilatları prosesin yavaş irəlilədiyini və rəsmi məlumatların yetərli olmadığını bildirərək azadlığa buraxılan məhbusların real sayının 60–70 arasında olduğunu qeyd ediblər.

Yanvarın 12-də Venesuela penitensiar qurumları daha 116 məhbusun azad edildiyini açıqlayıb.

Məhbuslara hüquqi dəstək göstərən aparıcı yerli qeyri-hökumət təşkilatı Foro Penal ilin əvvəlində həbsxanalarda ən azı 800 “siyasi məhbus”un olduğunu bildirib.

Buna baxmayaraq hökumət siyasi məhbusların mövcudluğunu inkar edir və saxlanılanların qanuni ittihamlarla üzləşdiyini iddia edir.