İraq nümayəndə heyəti ikitərəfli təhlükəsizlik məsələlərini müzakirə etmək üçün Səudiyyə Ərəbistanına səfər edib.

Bu barədə İraqın rəsmi İNA xəbər agentliyi məlumat yayıb.

Nümayəndə heyətinə Silahlı Qüvvələr Komandanlığının rəhbəri general-leytenant Əbdülemir əl-Şəmri rəhbərlik edir. Heyətdə kəşfiyyat, hava hücumundan müdafiə və terrorla mübarizə qurumlarının rəsmiləri də yer alıb. Danışıqlarda tərəflər arasında təhlükəsizlik sahəsində əməkdaşlıq və koordinasiyanın gücləndirilməsi yolları nəzərdən keçiriləcək.

Qeyd edək ki, iyulun 28-də Səudiyyə Ərəbistanı ölkənin şərq regionunda və paytaxt Ər-Riyadda yerləşən neft obyektlərini hədəf almağa cəhd edən çoxsaylı pilotsuz uçuş aparatlarının (PUA) hava hücumundan müdafiə sistemləri tərəfindən vurulduğunu bəyan etmişdi.

Hadisədən sonra ABŞ Mərkəzi Komandanlığı (CENTCOM) ABŞ və Səudiyyə Ərəbistanı hərbi qüvvələrinin İraqın şərqində yerləşən İranpərəst qruplaşmaların mövqələrinə birgə hava zərbələri endirdiyini açıqlamışdı.