Rəsmi Vaşinqton Karakasdakı müvəqqəti hakimiyyətə siyasi məhbusların azad edilməsi üçün təzyiq göstərməyə davam etdiyi bir vaxtda, venesuelalı müxalifətçi Maria Korina Maçadonun yanvarın 15-də Ağ Evdə ABŞ prezidenti Donald Tramp ilə görüşəcəyi bildirilib.
M.Maçado yanvarın 3-də ABŞ qüvvələrinin Nikolas Maduronu qaçırmasından sonra Vaşinqton rəhbərliyi tərəfindən prosesdən kənarda saxlanılıb və D.Tramp administrasiyası Venesuelanı “idarə edəcəyini” bəyan edib.
Venesuelalı müxalif lider Maria Korina Maçado və onun köməkçisi Edmundo Gonzalez Urrutianu nəzərə almayan D.Tramp bunun əvəzinə müvəqqəti prezident Delsi Rodrigez və N.Maduro hakimiyyətindən qalan digər rəsmilərlə işləyir.
D.Tramp müvəqqəti prezident D.Rodrigezi Vaşinqtonun geniş neft ehtiyatlarına çıxışı məsələsində müəyyən etdiyi xəttə əməl etməyə, əks halda bunun nəticələri ilə üzləşməyə hazır olmalı olduğu barədə xəbərdar edib.
Həmçinin Venesuela hazırki hökumət N.Maduro dövründə həbs edilmiş daha 116 nəfərin azad edildiyini açıqlayıb. Həmin şəxslərin əksəriyyəti mübahisəli 2024-cü il seçkilərindən sonra keçirilən etiraz aksiyalarında iştirak etdiklərinə görə həbs olunmuşdu.
Delsi Rodrigez qaçırılan Nikolos Maduronun sadiq müttəfiqi olmasına baxmayaraq, Venesuelanın geniş neft ehtiyatlarından yararlanmaq istəyən Vaşinqton rəhbərliyi ilə danışıqlar aparır.
ABŞ elçiləri diplomatik münasibətlərin kəsilməsindən yeddi il sonra Amerikanın paytaxt Karakasdakı səfirliyini yenidən açmaq məsələsini müzakirə etmək üçün ötən həftə şəhərə səfər ediblər.
D.Tramp yanvarın 11-də D.Rodrigezlə görüşməyə hazır olduğunu və öz administrasiyasının onun rəhbərlik etdiyi qurumla “həqiqətən yaxşı” işlədiyini bildirib.
Xatırladaq ki, ötən il Nobel Sülh Mükafatına layiq görülən Maria Korina Maçado bu mükafatı, özünün mükafata layiq görülməməsindən məyusluğunu gizlətməyən Donald Trampa ithaf etmişdi.
Qeyd edək ki, müvəqqəti prezident vəzifəsini icra edən Delsi Rodrigez yanvarın 12-də ölkədə bir sıra nazirlik dəyişiklikləri həyata keçirərək islahatlar apardığı bildirilir.
