Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyev arasında telefon danışığı olub. Türkiyə Prezidenti Administrasiyasının Mətbuat Xidmətinin yaydığı məlumata görə, söhbət zamanı iki ölkə arasındakı ikitərəfli əlaqələr, eləcə də regional və qlobal məsələlər müzakirə edilib.
R.T.Ərdoğan telefon danışığı zamanı Türkiyə ilə Azərbaycan arasında bütün sahələrdə əməkdaşlığın inkişaf etdirilməsinin vacibliyini qeyd edib. O, eyni zamanda Türkiyənin Cənubi Qafqazda davamlı sülhün təmin olunmasına yönəlmiş səylərə dəstəyini bir daha vurğulayıb.
"Terrorsuz Türkiyə" hədəfinə toxunan R.T.Ərdoğan bu təşəbbüsün bölgədəki terror təşkilatlarının məhvinə mühüm töhfə verəcəyini qeyd edib. Dövlət başçısı bu prosesin uğurla tamamlanmasının regional təhlükəsizliyin daha da möhkəmlənməsinə xidmət edəcəyini bildirib.
Azərbaycan Prezidenti İlham Əliyev isə söhbət zamanı Türkiyənin "Terrorsuz Türkiyə" hədəfi çərçivəsində əldə etdiyi uğurların önəmini xüsusi qeyd edib. O, əldə olunan irəliləyişdən məmnunluğunu ifadə edərək, qarşıya qoyulan məqsədlərə nail olunacağına əminliyini bildirib.
