Yanvarın 14-də (bu gün) Türkiyə Respublikasının xarici işlər naziri Hakan Fidan ilə iranlı həmkarı Abbas Əraqçi arasında telefon danışığı baş tutub. Bu barədə Türkiyə Xarici İşlər Nazirliyi məlumat yayıb.

Telefon danışığı zamanı davam edən regional gərginliyin azaldılmasına yönəlik atıla biləcək addımları müzakirə olunub. Hakan Fidan regional gərginliyin azaldılması baxımından danışıqların mühüm rol oynadığını xüsusi olaraq qeyd edib.

Qeyd edək ki, bu əlaqə iki xarici işlər nazirinin yanvarın 13-də keçirdikləri görüşdən sonra son 24 saat ərzində baş tutan ikinci təmas olub.

Xəbər verildiyi kimi, İran ötən aydan bəri milli valyuta olan rialın kəskin dəyər itirməsi və pisləşən iqtisadi şərait fonunda etiraz dalğası ilə üzləşib. Etirazlar dekabrın 28-də Tehranda başlayıb və sonradan bir neçə başqa şəhərə də yayılıb.

Hökumət rəsmiləri baş verənləri “iğtişaşlar” və “terror fəaliyyəti” kimi qiymətləndirərək ABŞ və İsraili bu prosesləri dəstəkləməkdə ittiham ediblər.

Rəsmi mənbələr tərəfinfən həlak olanlarla bağlı rəqəmlər açıqlanmasa da, ABŞ mərkəzli bir insan hüquqları təşkilatı təhlükəsizlik qüvvələri və etirazçılar da daxil olmaqla 2.550 nəfərin öldüyünü, 1.134-dən çox şəxsin isə yaralandığını təxmin edir.