Davam edən müharibəyə və mövcud çətinliklərə baxmayaraq Qəzzadakı xristian icması Pasxa bayramını qeyd etmək üçün Qəzza şəhərindəki Müqəddəs Ailə kilsəsində bir araya gəliblər. Ağır şəraitdə dini ənənələrinə sadiq qalan möminlər İsa Məsihin dirilməsini anmaq üçün təşkil olunan mərasimlərdə iştirak ediblər.

Qeyd edək ki, 2023-cü il oktyabrın 7-dən bəri davam edən hərbi əməliyyatlar zamanı xristian icmasının bir çox üzvü kilsə və evlərə edilən hücumlar nəticəsində həyatını itirib. Müharibənin səbəb olduğu çətinliklər, elektrik enerjisi, su və qida çatışmazlığı builki bayram mərasimlərinə də təsir göstərib. Hətta Pasxa bayramının rəmzi olan yumurta kimi ənənəvi məhsulların tapılması belə qeyri-mümkün hala gəlib.

İsrailin illərdir tətbiq etdiyi və hazırda daha da sərtləşdirdiyi blokada bölgədəki humanitar vəziyyəti daha da ağırlaşdırıb. Qəzzadan əldə edilən son görüntülər göstərir ki, yerli xristianlar bayramı aclıq və davam edən münaqişənin yaratdığı ağır şəraitdə qeyd edirlər.