Səudiyyə Ərəbistanının hava hücumundan müdafiə sistemləri İraq istiqamətindən ölkənin hava məkanına daxil olan üç pilotsuz uçuş aparatını (PUA) zərərsizləşdirib. Krallığın Müdafiə Nazirliyinin sözçüsü Turki əl-Maliki verdiyi açıqlamada dronların bazar günü səhər saatlarında vurulduğunu təsdiqləyib. Sözçü Səudiyyə Ərəbistanının öz suverenliyini və təhlükəsizliyini qorumaq üçün bütün zəruri əməliyyat tədbirlərini görəcəyini vurğulayıb.

Bu hadisə, fevral ayında ABŞ və İsrailin İrana hücum etməsindən sonra Yaxın Şərqdə artan gərginlik fonunda baş verib. Tehran rəhbərliyi həmin hücumlara cavab olaraq İsraili, eləcə də ABŞ-ın Körfəzdəki müttəfiqlərini, o cümlədən Birləşmiş Ərəb Əmirliklərini (BƏƏ) hədəf alacağını bildirmiş və Hörmüz boğazını bağlamaqla hədələmişdi. Bölgədə sabitliyi qorumaq üçün Pakistanın vasitəçiliyi ilə aprelin 8-də atəşkəs elan edilmişdi. İslamabaddakı danışıqlar daimi sülh sazişi ilə nəticələnməsə də, ABŞ Prezidenti Donald Tramp bu atəşkəsin müddətini qeyri-müəyyən vaxtadək uzatdı.

Baş verən insidentlə eyni gündə BƏƏ-nin Əbu-Dabi Əmirliyində yerləşən "Bərəkə" nüvə elektrik stansiyasının yaxınlığında da dron hücumu qeydə alınıb. Əbu-Dabi Media Ofisinin məlumatına görə, Əl-Dafra bölgəsindəki stansiyanın daxili perimetrindən kənarda yerləşən elektrik generatoruna dron zərbəsi endirilib və nəticədə yanğın baş verib. Hadisə yerinə cəlb olunan operativ qüvvələr tərəfindən yanğın söndürülüb. Rəsmi qurumlar hadisə zamanı xəsarət alanların olmadığını və ərazidə radiasiya fonunda heç bir dəyişikliyin qeydə alınmadığını açıqlayıblar.