Türkiyənin xarici işlər naziri Hakan Fidan Yeni il münasibətilə etdiyi paylaşımda Türkiyənin 2026-cı ildə də sülh, sabitlik və rifah naminə göstərdiyi səylərdə liderliyini davam etdirəcəyini, çoxtərəfli diplomatiyanı gücləndirəcəyini və humanitar məsuliyyətlərini yerinə yetirəcəyini bildirib.
Rəsmi "NSosyal" və "X" səhifələrində paylaşım edən Hakan Fidan qeyd edib ki, Türkiyə ötən il Qəzza və Ukraynadan Cənubi Qafqaza və Afrika Buynuzuna qədər geniş coğrafiyada baş verən böhranların həlli üçün etibarlı tərəfdaş kimi fərqlənib.
Hakan Fidan bildirib ki, rəsmi Ankara Prezident Rəcəb Tayyib Ərdoğanın rəhbərliyi ilə milli maraqların qorunmasına və Türkiyənin haqlı mövqeyinin müdafiəsinə yönəlmiş çoxşaxəli, proaktiv, balanslı və real xarici siyasət yürüdür.
“Milli maraqlarımızı qorumaq, haqlı mübarizəmizi imüdafiə etmək və Türkiyənin nüfuzunu hiss etdirmək üçün yorulmadan çalışmışıq. 2026-cı ildə də sülh, sabitlik və rifah naminə liderlik etmək, çoxtərəfli diplomatiyaya töhfə vermək və humanitar vəzifələrimizi yerinə yetirmək üçün eyni qətiyyətlə yolumuza davam edəcəyik”, – deyə Hakan Fidan vurğulayıb.
