Türkiyə Xarici İşlər Nazirliyi İsraildə saxlanılan 36 vətəndaşın oktyabrın 4-də vətənə qaytarılmasından sonra qalan vətəndaşların ayın 7-də İordaniya üzərindən geri qaytarılması istiqamətində işlərin davam etdiyini açıqlayıb.

Xarici İşlər Nazirliyi bəyan edib ki, Türkiyə "Qlobal Sumud" yardım donanmasının ələ keçirilməsindən sonra İsrail tərəfindən saxlanılan 14 Türkiyə vətəndaşının geri qaytarılması üçün səylərini davam etdirir.

Nazirlik sözçüsü Öncü Keçeli "X" platformasında etdiyi paylaşımda "Hazırda İsraildə saxlanılan 14 vətəndaşın sabah (7 oktyabr) İordaniya üzərindən ölkəmizə dönə bilməsi üçün çalışırıq" deyib.

Nazirlik bəyan edib ki, qalan məhbusların təhlükəsiz geri qayıtmasını təmin etmək üçün İordaniya və İsrail hakimiyyət orqanları ilə sıx əlaqə saxlayır.

Oktyabrın 4-də İsrailin basqını zamanı qanunsuz saxlanılan 36 Türkiyə vətəndaşı Ankaranın təşkil etdiyi xüsusi reyslə Türkiyəyə gətirilib.

"Sumud" donanmasına basqın

İsrail Hərbi Dəniz Qüvvələri oktyabrın 2-də gecə "Qlobal Sumud" yardım donanmasına qeyri-qanuni müdaxilə edərək, 50-dən çox ölkədən 470-dən çox fəalı saxlayıb.

Qeyd edək ki, humanitar yardım gəmilərinin karvanı təxminən 18 ildir İsrailin blokadası altında olan Qəzzaya tibbi ləvazimat və zəruri materiallar çatdırmaq üçün yola düşmüşdü.

İsrailin bölgəyə davam edən hücumları, əksəriyyəti qadın və uşaq olmaqla 67 mindən çox fələstinlinin həyatına son qoyub, Qəzzanın böyük hissəsini xarabalığa çevirib və demək olar ki, bütün əhalini didərgin salıb.