Türkiyə Prezidenti Administrasiyasının İctimaiyyətlə Əlaqələr Departamenti tərəfindən verilən bəyanata görə, Prezident Rəcəb Tayyib Ərdoğan Qazaxıstanın Türküstan şəhərində keçirilən Türk Dövlətləri Təşkilatının (TDT) qeyri-rəsmi sammiti çərçivəsində cümə günü Özbəkistan Prezidenti Şavkat Mirziyoyev ilə görüş keçirib.
Türkiyə Prezidenti Administrasiyasının İctimaiyyətlə Əlaqələr Departamentinin yerli sosial media platforması “NSosyal” vasitəsilə etdiyi paylaşımda iki liderin Türkiyə-Özbəkistan ikitərəfli münasibətləri ilə yanaşı, regional və qlobal prosesləri də müzakirə etdiyi bildirilib.
Görüşdə Prezident Ərdoğan başda müdafiə sənayesi və ticarət olmaqla, iki ölkə arasındakı əməkdaşlığın hər bir sahədə inkişaf etdirilməsi üçün işlərin qətiyyətlə davam etdiriləcəyini ifadə edib.
Türkiyə ilə Özbəkistanın beynəlxalq platformalardakı həmrəyliyini artıracağına olan inamını dilə gətirən Ərdoğan həmkarı Mirziyoyevi Türkiyədə təşkil olunacaq TDT Sammitinə və COP31 İqlim Sammitinə dəvət edib.
Prezident Ərdoğanın qaldığı oteldə mətbuata qapalı şəraitdə baş tutan görüşdə xarici işlər Naziri Hakan Fidan da iştirak edib.
Türküstanda ali səviyyədə qarşılanma
Prezident Ərdoğan sammit üçün gəldiyi Həzrət Sultan Beynəlxalq Hava Limanında Qazaxıstanın Dövlət Müşaviri Erlan Karin, Türküstan Vilayətinin Valisi Nuralan Kuranov, Qazaxıstan Xarici İşlər Nazirliyinin Almatı nümayəndəsi Canibek Caraskanoviç, Qazaxıstanın Ankaradakı Səfiri Yerkebulan Sapiyev və digər rəsmi şəxslər tərəfindən qarşılanıb.
Prezident Ərdoğanla birlikdə xanımı Əminə Ərdoğan və Türkiyə nümayəndə heyəti də Türküstana gəlib. Ərdoğan Qazaxıstan Prezidenti Kasım-Jomart Tokayevin dəvəti ilə TDT-nin qeyri-rəsmi sammitində iştirak edir.
Sammitdə Prezident Ərdoğanla yanaşı, Azərbaycan Prezidenti İlham Əliyev, Özbəkistan Prezidenti Şavkat Mirziyoyev, Qırğızıstan Prezidenti Sadır Japarov və Şimali Kıbrıs (Kipr) Türk Cümhuriyyətinin Prezidenti Tufan Ərhürman iştirak edir.
Dövlət başçısı Astanada görüşlərdən sonra Türküstana səfər edib
Prezident Ərdoğan mayın 14-də Astanadakı Müstəqillik Sarayında Qazaxıstan Prezidenti Kasım-Jomart Tokayev ilə təkbətək görüş keçirmiş və Türkiyə-Qazaxıstan Yüksək Səviyyəli Strateji Əməkdaşlıq Şurasının 6-cı İclasında iştirak etmişdi.
Görüşlərdən sonra təşkil olunan birgə mətbuat konfransından sonra iki lider Türkiyə-Qazaxıstan Biznes Forumunun bağlanış mərasiminə qatılıb. Prezident Ərdoğan TDT-nin qeyri-rəsmi sammitində iştirak etmək üçün səhər saatlarında Astanadan Türküstan şəhərinə keçib.
