Türkiyə Prezidenti Rəcəb Tayyib Ərdoğan və Rusiya prezidenti Vladimir Putin Türkmənistanın paytaxtı Aşqabadda keçirilən Beynəlxalq Sülh və Etimad Forumu çərçivəsində bir araya gəliblər. Görüş zamanı ikitərəfli münasibətlər, eləcə də Rusiya–Ukrayna müharibəsi ilə bağlı genişmiqyaslı sülh səyləri müzakirə olunub.
Türkiyə Prezident Administrasiyasının İctimaiyyətlə Əlaqələr İdarəsinin dekabrın 12-də yaydığı məlumata görə, ölkə başçısı R.T.Ərdoğan V.Putinlə görüşü zamanı davam edən Rusiya–Ukrayna müharibəsinə son qoyulmasına yönəlmiş sülh danışıqlarını yaxından izlədiyini və rəsmi Ankaranın bu danışıqlara ev sahibliyi edə biləcəyini bildirib.
Prezident R.T.Ərdoğanın görüşlərində Türkiyənin xarici işlər naziri Hakan Fidan, energetika və təbii sərvətlər naziri Alparslan Bayraktar, Milli Kəşfiyyat Təşkilatının rəhbəri İbrahim Kalın, Prezident administrasiyasının ictimaiyyətlə əlaqələr idarəsinin rəhbəri Burhanəddin Duran, xarici siyasət və təhlükəsizlik üzrə baş müşavir Akif Çağatay Kılıç, eləcə də Ədalət və İnkişaf Partiyasının (AK Parti) sədr müavini Halit Yerebakanın da daxil olduğu nümayəndə heyəti iştirak edib.
Prezident R.T.Ərdoğan müharibənin “ədalətli və davamlı sülh” yolu ilə başa çatdırılmasına yönəlmiş təşəbbüslərin əhəmiyyətini vurğulayaraq, hər iki tərəf üçün real fayda yarada biləcək istiqamətlərdə irəliləyiş əldə olunmasının mümkün olduğunu qeyd edib.
O, xüsusilə enerji obyektlərini və limanları hədəf alan hücumları əhatə etməyən, məhdud xarakterli atəşkəs mexanizminin tətbiqinin faydalı ola biləcəyinə diqqət çəkib.
Prezident Administrasiyasının İctimaiyyətlə Əlaqələr İdarəsinin məlumatında bildirilir ki, dövlət başçısı R.T.Ərdoğan rəsmi Ankaranın müharibəyə son qoyulmasına yönəlmiş danışıqlar prosesini izləməyə davam etdiyini və bu çərçivədə istənilən formatda keçiriləcək görüşlərə ev sahibliyi etməyə hazır olduğunu bir daha təsdiqləyib.
“Sülh və Təhlükəsizlik: Dayanıqlı Gələcək naminə Məqsədlərin Birləşdirilməsi” mövzusunda keçirilən forum qlobal sülh təşəbbüslərinin gücləndirilməsinə yönəlmiş yüksək səviyyəli fikir mübadiləsi üçün platforma rolunu oynayıb.
Rusiya prezidenti Vladimir Putin forum çərçivəsində ayrıca çıxış edərək dövlətlərarası münasibətlərin Birləşmiş Millətlər Təşkilatının Nizamnaməsinin prinsiplərinə uyğun şəkildə qurulmasının vacibliyini vurğulayıb. V.Putin Türkmənistanın balanslaşdırılmış xarici siyasətini və regional sabitliyə verdiyi töhfəni yüksək qiymətləndirib.
Görüşlər zamanı iki lider Fələstin və Suriyadakı vəziyyəti, eləcə də Cənubi Qafqazda sülh prosesi ilə bağlı məsələləri də müzakirə ediblər.
Prezident R.T.Ərdoğanın Aşqabada səfəri çərçivəsində Türkmənistan prezidenti Sərdar Berdiməhəmmədov və digər regional rəsmilərlə keçirilən görüşlər də baş tutub. Bu təmaslar forum müddətində rəsmi Ankaranın geniş diplomatik fəaliyyətini əks etdirib.
