Rusiya qoşunlarının irəlilədiyi cəbhə xətti boyunca yerləşən Zaporojya və Dnipropetrovsk bölgələrində minlərlə uşaq və onların ailələrinin təxliyəsinə qərar verilib. Bu barədə Ukraynanın Yenidənqurma naziri Oleksiy Kuleba dekabrın 2-də “Telegram” üzərindən yaydığı açıqlamada bildirib.
Nazir qeyd edib ki, təhlükəsizlik vəziyyətinin ağırlaşması səbəbindən Zaporojya və Dnipropetrovsk bölgələrində cəbhə xəttinə yaxın 44 yaşayış məntəqəsindən 3 mindən çox uşaq və onların valideynlərinin məcburi təxliyəsi barədə qərar qəbul edilib. Təxliyə prosesi Rusiyanın bombardmanlarının hədəfində olan və Moskva rəhbərliyinin müttəfiqi Belarusla sərhəddə yerləşən Çerniqov bölgəsində də davam etdirilir.
O.Kulebanın sözlərinə görə, ötən ilin iyun ayından etibarən cəbhə bölgələrindən daha təhlükəsiz ərazilərə ümumilikdə 150 min nəfər köçürülüb. Təxliyə olunanlar arasında təxminən 18 min uşaq, eləcə də hərəkət imkanları məhdud olan 5 mindən çox şəxs var.
Qeyd edək ki, Rusiya 2022-ci ilin fevralında başladığı hərbi əməliyyatlardan sonra Ukraynanın əsas sənaye bölgələrindən biri olan Dnipropetrovsk istiqamətində irəliləyişini davam etdirir. Cənubdakı Zaporojya bölgəsində isə Rusiya qüvvələrinin irəliləyişi şərq cəbhəsi ilə müqayisədə daha məhdud olsa da, son aylarda bu istiqamətdə də sürətlənmə müşahidə olunur.
Bundan əlavə, rəsmi Moskva son dövrlərdə hər iki bölgədə yeni yaşayış məntəqələrinin nəzarətə götürüldüyünü iddia edir. Rusiya 2022-ci ilin sentyabrında Zaporojya, Donetsk, Luqansk və Xerson bölgələrini ilhaq etdiyini elan etsə də, həmin ərazilərin hamısında tam hərbi nəzarətin təmin olunduğunu iddia etməyib.
