Rusiyanın Ukraynanın paytaxtı Kiyevə gecə saatlarında endirdiyi aviazərbələr nəticəsində dördü uşaq olmaqla, ümumilikdə on dörd nəfər yaralanıb.

Kiyev Hərbi Administrasiyasının rəsmi ‘‘Telegram’’ kanalında yayılan bəyanatda deyilir: ‘‘Hər kəsə tibbi yardım göstərilir, bir neçə adam xəstəxanaya yerləşdirilib’’.

Kiyev meri Vitali Kliçko bildirib ki, hücum zamanı iki çoxmərtəbəli yaşayış binasına ziyan dəyib. Lakin o, binaların birbaşa zərbə alıb-almadığını və ya məhv edilmiş raketlərin qalıqlarının həmin binalara düşüb-düşmədiyini bildirməyib.

2014-cü ildə Krımı və Donbas bölgəsinin bir hissəsini ilhaq edən Rusiya 2022-ci ilin fevralında Ukraynada genişmiqyaslı hərbi əməliyyatlara başlayıb. Müharibə hələ də davam edir. Bu müddət ərzində hər iki tərəf yüz minlərlə hərbçisini itirib, minlərlə mülki şəxs isə hücumlar nəticəsində həlak olub.