İsrail Müdafiə Nazirliyi cümə günü 2026-cı ilə dair müdafiə büdcəsinin 112 milyard şekel (təxminən 34,63 milyard dollar) olduğunu açıqlayıb. Bu əvvəlki layihədə nəzərdə tutulan 90 milyard şekeldən (təxminən 27,8 milyard dollar) yüksəkdir.

Müdafiə naziri Yisrael Katz və maliyyə naziri Bezalel Smotriç müdafiə xərcləri çərçivəsi barədə razılığa gəliblər. Büdcə mart ayına qədər təsdiqlənməlidir, əks halda ölkədə yeni seçkilər keçirilə bilər.

Müdafiə naziri Yisrael Katz deyib:"İsrail Müdafiə Qüvvələrini gücləndirmək, döyüşçülərimizin ehtiyaclarını tam ödəmək və ehtiyatlara düşən yükü azaltmaq üçün qətiyyətli tədbirlər görməyə davam edəcəyik. Beləliklə, İsrail dövlətinin bütün cəbhələrdə təhlükəsizliyini təmin edəcəyik’’.

Smotriçin ofisi bildirib ki, 2026-cı il müdafiə büdcəsi 2023-cü il müharibədən əvvəlki dövrlə müqayisədə 14,5 milyard dollar (47 milyard şekel) artıb.

Təl-Əvivin Qəzzada apardığı amansız müharibə İsrail üçün böyük maliyyə yükü yaradıb. 2024-cü ildə Fələstin əraziləri və Livanda aparılan müharibəyə 31 milyard dollar xərclənib.