BMT-nin Ümumdünya Ərzaq Proqramının (WFP) verdiyi bəyanata görə, müharibənin səbəb olduğu qiymət artımları qlobal aclıq səviyyələrini rekord həddə çatdıra bilər ki, bu da humanitar yardımın maliyyələşdirilməsini çətinləşdirə bilər.
Birləşmiş Millətlər Təşkilatı xəbərdarlıq edib ki, Yaxın Şərq müharibəsi iyun ayına qədər davam edərsə, əlavə 45 milyon insan kəskin aclıqla üzləşə bilər və dünya miqyasında bu rəqəm "dəhşətli" səviyyəyə yüksələ bilər.
Müharibə üçüncü həftəsində yüzlərlə insanın ölümünə səbəb olub. İranın İsrail və Körfəz ölkələrinə qarşı cavab zərbələri endirməsi, Livanda isə İsrail ilə Hizbullah arasında yeni cəbhənin açılması ilə vəziyyət daha da gərginləşib.
Birləşmiş Millətlər Təşkilatının Ümumdünya Ərzaq Proqramının (WFP) icraçı direktor müavini Karl Skau martın 17-də Cenevrədə keçirilən mətbuat konfransında deyib: "Əgər Yaxın Şərq münaqişəsi iyun ayına qədər davam edərsə, qiymət artımları səbəbindən əlavə 45 milyon insan kəskin aclığa sürüklənə bilər. Bu, qlobal aclıq səviyyələrini bütün zamanların rekorduna çatdıracaq və bu, çox, çox dəhşətli bir ehtimaldır. Hazırda onsuz da tarixi rekord hədd olan 319 milyon insan kəskin qida çatışmazlığı ilə üz-üzədir. Həqiqətən də, bu, vəziyyəti tamamilə başqa bir səviyyəyə aparıb çıxarır".
Skau qeyd edib ki, WFP fevralın 28-də müharibə başlamazdan əvvəl əsasən bir “güclü fırtına" ilə üz-üzə idi. O, bunun ekstremal hava hadisələri, münaqişələr və bəzi bölgələrdə aclıq elan edilməsi ilə daha da fəlakətli hala gəldiyini vurğulayaraq, "Aclıq heç vaxt bu qədər şiddətli olmamışdıı. Eyni zamanda, resurslar 2023 və 2024-cü illərin səviyyəsindən kəskin şəkildə azalıb” deyib.
Heyət sayında ixtisarlar etmək və əməliyyatları sadələşdirmək məcburiyyətində qaldıqlarını deyən Skau, "əslində imkanlarımızın son həddinə qədər sıxılmış vəziyyətdəyik" deyə bildirib.
O, Yaxın Şərq müharibəsinin WFP-nin əməliyyatlarını daha baha başa gətirdiyini qeyd edib.
Skau agentliyin tədarük zəncirindəki fasilələrlə mübarizə aparmağa çalışdığını, lakin xüsusilə yanacaq qiymətlərindəki artım və daha uzun marşrutlar səbəbindən əməliyyat xərclərinin kəskin yüksəldiyini söyləyib.
