İsrail Təhlükəsizlik Kabineti Qəzzaya hücumun mərhələli şəkildə genişləndirilməsini təsdiqləyib, UNRWA isə bölgədəki səhiyyə xidmətlərinin ciddi resurs çatışmazlığı ilə qarşı-qarşıya olduğunu açıqlayıb.
Baş nazir Benyamin Netanyahunun Təhlükəsizlik Kabineti Qəzzaya hücumun tədricən genişləndirilməsini təsdiqləyib.
Baş Qərargah rəisi Eyal Zamir mayın 4-də verdiyi açıqlamada İsrail ordusunun Qəzzaya hücumunu genişləndirmək üçün ehtiyatda olan on minlərlə əsgəri çağırmaq əmrinin verilməyə başlandığını bildirib.
Mayın 4-də Yəməndəki husilər tərəfindən buraxılan raket parçasının İsrailin əsas keçid məntəqəsi olan "Ben Gurion" hava limanı yaxınlığına düşməsindən bir neçə saat sonra Netanyahu videomüraciətində Qəzzada müharibənin "növbəti mərhələsini" müzakirə etmək üçün Təhlükəsizlik Kabinetini topladığını açıqlayıb.
Qeyd edək ki, münaqişəni iki aydır dayandıran ABŞ-ın dəstəklədiyi atəşkəsi birtərəfli qaydada pozduqdan sonra İsrail mart ayında Qəzzaya hücumunu bərpa edib.
İsrailin "Ynet" xəbər saytının verdiyi məlumata görə, BMT-nin Fələstinli Qaçqınlara Yardım və İşlər üzrə Agentliyi (UNRWA) mayın 4-də İsrailin blokadası və davam edən hücumları səbəbindən Qəzzada səhiyyə xidmətlərinin ciddi resurs çatışmazlığı ilə üzləşdiyi barədə xəbərdarlıq edib.
"Əsas ehtiyatların demək olar ki, üçdə biri tükəndi və daha üçdə birinin iki ay ərzində tükənəcəyi gözlənilir" deyə agentlik "X" platforması vasitəsilə vəziyyətin çətinliyini bir daha vurğulayıb.
Agentlik davam edən blokada və bombardmanlar arasında səhiyyə xidmətlərinin "kritik dərəcədə zəif resurs" olaraq qaldığını bildirib, lakin UNRWA-nın Qəzzada səhiyyə xidmətləri göstərən əsas qurumlardan biri olduğunu qeyd edib.
