Oktyabrın 26-da Malayziyada Cənub-Şərqi Asiya Ölkələri Assosiasiyasının (ASEAN) 47-ci sammiti öz işinə başladı. Sammit çərçivəsində liderlər Şərqi Timoru təşkilatın 11-ci üzvü kimi qəbul etdilər.
Malayziyanın Baş naziri Ənvər İbrahimin ev sahibliyində keçirilən sammit oktyabrın 28-dək davam edəcək. Qeyd edək ki, Malayziya 1967-ci ildən bəri beşinci dəfə ASEAN-a sədrlik edir.
Liderlər Kuala Lumpur Konqres Mərkəzində Şərqi Timorun rəsmi üzv kimi qəbul edilməsi ilə bağlı keçirilən imza mərasimində iştirak etdilər. Şərqi Timor 2011-ci ildə üzvlük üçün müraciət etmiş və 2022-ci ildə müşahidəçi statusu almışdır.
ASEAN-ın hazırkı üzvləri Bruney, Kamboca, İndoneziya, Laos, Malayziya, Myanma, Filippin, Sinqapur, Tayland və Vyetnamdır. Təşkilat 1967-ci il avqustun 8-də Banqkokda yaradılıb.
Sammit “İnklüzivlik və Davamlılıq” mövzusunda keçirilir. Malayziyanın Baş naziri Ənvər İbrahim tədbirdə ASEAN-a üzv dövlətlərin liderlərini, yüksək vəzifəli şəxsləri, həmçinin ABŞ, Cənubi Afrika, Braziliya, Çin, Yaponiya, Cənubi Koreya və digər əsas tərəfdaş ölkələrin rəsmilərini qəbul edir.
ABŞ prezidenti Donald Tramp da sammitdə iştirak edir və Ənvərlə birlikdə iyul ayında Kamboca ilə Tayland arasında baş vermiş sərhəd toqquşmalarını sona çatdıran sülh müqaviləsinin imza mərasimində iştirak edəcək.
2002-ci ildə müstəqillik qazanan Şərqi Timorun əhalisi təxminən 1,3 milyon nəfərdir.
