Ukrayna dövlət rəsmiləri ölkənin cənubundakı Xerson şəhərində avtobusa təşkil edilən Rusiyaya məxsus dron hücumu nəticəsində iki nəfərin öldüyünü, yeddi nəfərin isə yaralandığını açıqlayıblar.

Bölgə qubernatoru Oleksandr Prokudin “Telegram” kanalında etdiyi açıqlamada zərər çəkənlərin əksəriyyətinin kommunal xidmət işçiləri olduğunu bildirib. O, hadisə yerindən paylaşdığı görüntülərdə şüşələri partlamış avtobusu və qan izləri olan bir meyiti göstərib.

Ukraynanın İnsan Hüquqları üzrə Ombudsmanı Dmitro Lubinets hadisəylə bağlı  “Telegram”da etdiyi açıqlamada deyib: “Bu cür hücumlar mülki əhaliyə qarşı sistemli terror siyasətinin bir hissəsidir.”

Rusiya qüvvələrinin ələ keçirdiyi yeganə regional mərkəz olan Xerson 2022-ci ildə Ukrayna hərbçiləri tərəfindən geri alınsa da, şəhər Dnepr çayının qarşı sahilində yerləşən Rusiya qüvvələrinin hücumlarına getdikcə daha çox məruz qalır.

Ukrayna rəsmiləri Rusiya qüvvələrini cəbhə xəttinə yaxın ərazilərdə, xüsusilə də Xersonda mülki şəxslərə qarşı qəsdən və sistemli kiçik dron hücumları təşkil etməkdə günahlandırırlar.

Həmçinin son bir neçə aydır demək olar ki, hər gün Rusiya hücumlarının hədəfi olan Odessa bölgəsi də gecə boyu hücuma məruz qalıb. Bölgə qubernatoru Oleq Kiper “Telegram” kanalındada etdiyi açıqlamada bir limanda anbarın və ətrafdakı binaların zərər gördüyünü bildirib.

Bununla yanaşı Ukrayna Hərbi Hava Qüvvələri Rusiyanın gecə ərzində buraxdığı 163 uzun mənzilli drondan 142-ni məhv etdiyini açıqlayıb.