Türkiyənin enerji və təbii sərvətlər naziri Alparslan Bayraktar bildirib ki, ölkə yaşıl enerjiyə keçid və iqlim dəyişikliyi ilə mübarizə çərçivəsində üç əsas istiqamətə diqqət yetirir. Nazirin sözlərinə görə, bura enerji təchizatı təhlükəsizliyi, enerji müstəqilliyi və 2050-ci illərin əvvəlinə qədər karbon emmisiyalarının sıfıra endirilməsi daxildir.
A.Bayraktar qeyd edib ki, son illərdə dünyada yaşanan qeyri-müəyyənliklər və Yaxın Şərqdəki müharibə ilə bağlı son böhran enerji təhlükəsizliyinin nə qədər vacib olduğunu bir daha göstərib.
Dünyanın sürətlə elektrikləşməyə yönəldiyini ifadə edən Alparslan Bayraktar bu məsələnin COP31 sammitinin əsas mövzularından biri olduğunu xatırladıb. O, süni intellekt, məlumat mərkəzləri, elektromobillər və soyutma sistemləri səbəbindən qarşıdakı dövrdə elektrik enerjisinə tələbatın artmaqda davam edəcəyini vurğulayıb.
Nazir bu prosesdə nüvə enerjisinin Türkiyə üçün strateji əhəmiyyət kəsb etdiyini bildirərək emissiyasız elektrik istehsalı üçün ölkənin mütləq nüvə elektrik stansiyaları tikməli olduğunu qeyd edib. A.Bayraktar bildirib ki, Türkiyə artan enerji tələbatını ödəmək üçün bərpa olunan enerji potensialını sürətlə artırır və enerji səmərəliliyi sahəsindəki layihələrə xüsusi diqqət yetirir.
