İsrail ordusu yanvarın 1-də Qəzzanın bir neçə bölgəsini atəşə tutub. Məlumatlara görə, İsrailə məxsus döyüş təyyarələri Qəzzanın cənubunda yerləşən Rəfah şəhərinin şərqinə hava zərbələri endirib. Hücumlar zamanı ərazidə güclü atəş səsləri eşidilib. Qəzzanın Zeytun və Şucaiyyə məhəllələri ilə Qəzzanın mərkəzində yerləşən Bureyc qaçqın düşərgəsinin şərqinə də aviazərbələrin endirildiyi bildirilib. İtki və ya yaralılarla bağlı hələlik rəsmi məlumat verilməyib. Hədəf alınan ərazilər hələ də İsrail ordusunun nəzarəti altındadır.
Fələstin tərəfi atəşkəs rejiminin İsrail tərəfindən dəfələrlə pozulduğunu bildirir. Qəzzadakı media ofisinin məlumatına görə, atəşkəs qüvvəyə minəndən bəri İsrailin hücumları nəticəsində ən azı 418 fələstinli həlak olub, 1110-dan çox insan isə yaralanıb.
2023-cü ilin oktyabr ayından etibarən İsrailin Qəzzaya endirdiyi zərbələr nəticəsində əksəriyyəti qadın və uşaq olmaqla 71.000-dən çox insan həyatını itirib, 171.000-dən çox insan isə yaralanıb.
