Amerika Birləşmiş Ştatları Dövlət Katibi Marko Rubio və Rusiya Xarici İşlər Naziri Sergey Lavrov Ukrayna müharibəsini sona çatdırmaq üçün danışıqların növbəti mərhələsini müzakirə etmək məqsədilə bir araya gəliblər.
Dövlət Departamentinin sözçüsü Temmi Brüsün verdiyi məlumata görə, diplomatlar ABŞ və Rusiya arasında əlaqələrin bərpası üzrə işləri davam etdirmək barədə razılığa gəliblər.
Bəyanatda ABŞ və Rusiya arasında Səudiyyə Ərəbistanının ev sahibliyində keçiriləcək növbəti danışıqların nə zaman başlayacağı barədə heç bir məlumat verilməyib.
Marko Rubio həmçinin Yaxın Şərqdəki hərbi fəaliyyətlə bağlı Sergey Lavrovu məlumatlandırıb. O, ABŞ qüvvələrinin Yəməndə husilərə qarşı hücumlar həyata keçirdiyini qeyd edib.
ABŞ Yəməndə hava hücumları həyata keçirərək azı 20 nəfəri qətlə yetirib. ABŞ prezidenti Donald Tramp isə Qırmızı dənizdə gəmilərə hücumların davam edəcəyi təqdirdə "cəhənnəm yağışları"nın yağacağı ilə bağlı xəbərdarlıq edib.
ABŞ prezidenti Donald Tramp ilə Ukrayna prezidenti Volodimir Zelenski arasında yaşanan son gərginliklərə baxmayaraq, rəsmi Kiyev, Moskvanın şərqi Ukraynada hücumlarını dayandırması şərti ilə ABŞ vasitəçiliyi ilə 30 günlük şərtsiz atəşkəsə prinsipcə razılıq verib.
Lakin Rusiya prezidenti Vladimir Putin hər hansı bir atəşkəsə razılıq verməyib, əksinə, ABŞ-ın Ukrayna ilə razılaşmasında tələb olunanlardan daha ağır şərtlər irəli sürüb.
